Çekdarên hikumeta demkî ya Sûriyeyê roja şemiyê (20 Îlon 2025) gundê Um Tîna yê bajarê Dêr Hafirê yê kantona Tebqayê topbaran kiribû, di encamê de 7 sivîl şehîd bûn û 4 kes jî birîndar bûn.
Der barê mijarê de Tevgera Civaka Demokratîk (TEV-DEM) bi daxuyaniyekê komkujiya ku çekdarên hikumeta demkî ya Sûriyeyê kiribû, şermezar kir.
Di daxuyaniya TEV-DEMˊê de hate gotin: “Şeva 20ˊê Îlona 2025ˊan komên girêdayî hikumeta demkî ya Şamê û yên bi piştevaniya dewleta Tirk li dijî sivîlên gundê Um Tîna yê Dêr Hafirê yê rojhilatê Helebê komkujiyek hovane pêk anîbû. Koman bi dronan û dûre topan malên welatiyên gund hedef girtin. Bi wê re di nav de zarok û jin 7 kes şehîd bûn û 4 jî birîndar bûn.
Aliyên komkujî kiriye bi vê yekê nekirin, bi lez Hêzên Sûriya Demokratîk (QSD) tawanbar kir ku ew li pişt van topbaran in. Tevî ku gundê Um Tîna di herêmên bin kontrola QSDˊê de ye.”
Di berdewama daxuyaniyê de hat diyarkirin: “Bê guman em der barê pêkanîna komkujiyan li dijî sivîlan ji hêla van koman ve matmayî neman, ji ber ku komkujiyên dişibihên vê li Efrînê, Girê Spî, Serêkaniyê, li dijî Elewiyan û Durziyan jî kiribûn. Dêr teqandin. Van koman careke din, destpêkê ji gelê Sûriyeyê re û dûre ji cîhanê re, îsbat kir ku di oxira ferzkirina zihniyet û ajandeyên xwe yên tundraw de ew ê her tiştî bikin.”
TEV-DEMˊê di daxuyaniya xwe de destnîşan kir ku QSDˊê ya ku li qadên şeref û rûmetê dîrok şahideya wê herî zêde girîngiyê dide parastina sivîlan. QSDˊê di bingeha avakirina xwe de ji bo paratina tevahî pêkhateyan e, gelên Bakur û Rojhilatê Sûriyeyê û cîhan ji terorê rizgar kir.
Di daxuyaniyê de TEV-DEMˊê komkujiya li dijî sivîlên gundê Um Tîna şermezar kir û bang li gelê Sûriyeyê, civata navneteweyî û saziyên eleqedar kir ku van komên destê wan di xwîna Sûriyeyiyan ji Kurd, Ereb û Suryan, tevahî ol û mezheban de heye aşkera bikin û hesab ji wan bixwazin.
TEV-DEMˊê bang li hêzên navneteweyî kir ku ber berpirsiyartiyên xwe li hember gelê Sûriyeyê bi giştî û li hember QSDˊê û ezmûna demokratîk a li Bakur û Rojhilatê Sûriyeyê bi taybet rabin, da ku Sûriyeyeke demokratîk a pirrengî ya nenavendî ji bo tevahî Sûriyeyiyan were avakirin.
Di dawiyê de TEV-DEMˊê aşkera kir ku “Kî zarok, jin û sivîlan qetil dike, pêkhateyan dike armanc û bi hêzên herêmî gefan li gelê xwe dixwe nikare Sûriyeyek nû ava bike, lê belê ji nû ve dîktatorekî din ava dike, zordarî û dûrxistinê pêk tîne.”
