Piştî ku 175 aktîvîstên fîloyê ji aliyê hêzên Îsraîlê ve hatin binçavkirin, ku ji bo şikandina dorpêça li ser Xezeyê bi rê ketibûn, li bendergeheke Gîrîtê hatin danîn. Li gorî nûçegihanê AFP’ê, aktîvîst li gel ewlekariya peravî ya Yewnan li otobusan hatin siwarkirin û ber bi cihekî din ê giravê ve hatin veguhestin.
Wezareta Karên Derve ya Yewnanistanê diyar kir ku ew bi Îsraîlê re di nava danûstandinan de ne û hewl didin ku aktîvîstan bi rengekî ewle bigihînin welatê wan.
Îsraîlê beriya niha ragihandibû ku kesên di nava fîloyê de wê bibin Îsraîlê. Lê belê Wezîrê Karên Derve Gideon Saar anî ziman ku di encama lihevkirina bi hikumeta Yewnan re wê aktîvîst li Yewnanistanê bêne danîn.
NERAZÎBÛNA NAVNETEWEYÎ
Operasyon li Ewropayê bû sedema nerazîbûnê. Spanya, Tirkiye û Pakistan jî di nav de gelek welatan bi daxuyaniyeke hevpar Îsraîl bi binpêkirina hiqûqa navneteweyî sûcdar kirin û xwestin, kesên hatin binçavkirin bêne berdan.
Fîloya aktîvîstan li peravên Girava Gîrîtê ya li Derya Spî hatibû rawestandin û amadekaran gotibûn, destwerdan li deryaya navneteweyî hatiye kirin, lewma li dijî hiqûqê ye.
