HTŞ a bi serkêşiya Colanî ku piştî hilweşîna rejîma Esad li Sûriyeyê li ser desthilatdariyê hate danîn, êrişên xwe yên li ser hindikahiyan zêde dike. Ev êrişên ku li dijî Elewî û Durziyan destpê kirin, herî dawî li taxên Şêxmeqsûd û Eşrefiyê yên Helebê ku piraniya şêniyên wê Kurd in, dewam kirin.
Aktîvîsta Komeleyên Elewiyan a Demokratîk (DAD) Kader Ûzûn anî ziman ku ev polîtîkaya komkujiyê ya li dijî nasnameyên cuda bi rêk û pêk dewam dike û li Rojhilata Navîn gel roj bi roj ji hev têne cudakirin, ferzkirinên olî zêde dibin. Kader Ûzûn ragihand ku polîtîkayên li herêmê têne meşandin li derveyî mirovahiyê ne û diyar kir ku di serî de Kurd, Elewî, Durzî û hemû gelên bindest divê têkoşîneke hevpar bimeşînin.
Kader Ûzûn destnîşan kir ku pêvajoya heyî binpêkirina mafên bingehîn ên jiyanê ye û got, “Di pêvajoya jinûve dîzaynkirina Rojhilata Navîn de netewe dewletên global û herêmî li hev kom dibin û bi mejiyekî barbar nexşeyan xêz dikin. Li ser van maseyan polîtîkayên welê têne hilberandin ku Kurdan tine dihesibînin û dixwazin wan tine bikin.”
‘KOMKUJIYÊN TÊNE KIRIN PIRSGIRÊKA HEVPAR A HEMÛ GELAN E’
Kader Ûzûn got, polîtîkayên ku netewe dewlet bi taybetî li cografya Rojhilata Navîn û Kurdistanê dimeşînin li ser bingeha berjewendiyan e, ev pêvajo bi komkujiyan tê meşandin û axaftina xwe bi vî rengî dewam kir, “Ev êrişên li ser gelê Kurd, Elewî, Durzî û gelên din ên bindest li derveyî mirovahiyê ne. Ev rewş berpirsyariya dîrokî ya her mirovên xwedî wijdan e ku nikare bêdeng bimîne. Ev mesele ne tenê ya Kurdan e, pirsgirêka hevpar a hemû gelên herêmê ye. Ne tenê qedereke Kurdan e. Bûyerên ku diqewimin pêwendiya xwe bi pêvajoya mêtingehkirina Rojhilata Navîn ji aliyê sîstema kapîtalîst û polîtîkayên sînorên çêkirî yên netewe dewletan heye. Hewl tê dayin ku ev tablo bi rêya feraseteke barbar a weke mejiyê DAÎŞ’ê li herêmê bi cih bê anîn. Yekane rêya rawestandina vê pêvajoyê jî afirandina xeta têkoşîna hevpar a gelan e.”
‘EM NEÇAR IN KU BIBIN HÊMAN ESASÎ YA TÊKOŞÎNÊ’
Kader Ûzûn bi bîr xist ku gelê Kurd bi salan e berxwedaneke bi rûmet dimeşîne û got, “Komkujiyên li hemberî Elewî û Durziyan wijdanê mirovahiyê birîndar kir. Divê em ne tenê piştevaniyê bikin, her wiha em neçar in ku bibin hêmana esasî ya vê têkoşînê. Em ji bûyerên diqewimin şerm dikin, pê diêşin. Li hemberî van komkujiyan û projeyên dewleta yekperest a li Rojhilata Navîn tê ferzkirin, divê sekneke hevpar bê nîşandan.”
‘YEK OL, YEK ZILMAN LI HERÊMÊ TÊ FERZKIRIN’
Kader Ûzûn ragihand ku hewl tê dayin li herêmê avaniyên yek ol, yek netewe û yek al bêne avakirin û got, “Feraseta yek ziman, yek ol, yek artêş û yek nasname mejiyekî faşîzan e. Bi vî mejî tê xwestin hem Kurd hem jî Elewî bêne tinekirin. Halbûkî Rojhilata Navîn ji aliyê dîrokî ve herêmke cihêreng e. Gelên herêmê berdêla wê canê xwe jî be li hemberî van ferzkirinan li ber xwe didin. Ji ber ku bi yekperestiyê, bi faşîzm û zordariyê paşerojek nikare bê avakirin.”
Kader Ûzûn bal kişand ser girîngiya avakirina xeteke têkoşînê ya hevpar a Elewî, Kurd û Durziyan û destnîşan kir ku heta koordînasyoneke yekbûyî neyê avakirin ev tundî nikare bê şikandin.
