Di nameyeke navxweyî ya Pentagonê de eşkere bû ku Dewletên Yekbûyî yên Emerîkayê (DYE) hin pêkanîn xistiye rojeva xwe ku li ser wan hevalbendên xwe yên NATO’yê ferz bike ku di dema şerê Îranê de piştgiriyeke têrker nedaye. Li gorî agahiyên ku ji aliyê Reutersê ve hatin ragihandin, ev pêkanîn di asta herî bilind de tê nîqaşkirin.
Di belgeya navborî de hate ragihandin ku hin hevalbendan nexwestin ku DYE baregeh û qada wan hewayî bi kar bînin û hate gotin, vê yekê karê esasî yê NATO’yê lawaz kiriye.
BETALKIRINA ENDAMETIYA SPANYAYÊ YA LI NAVA NATO’YÊ
Betalkirina endametiya Spanyayê ya li NATO’yê û jinûve nirxandina helwesta DYE’yê ya têkildarî serweriya Îngiliz a li ser Falkland Islands’ê ji wan pêkanînên hatine nirxandin e. Her wiha tê nirxandin ku hevalbendên ‘ne aheng’ dûrî wezîfeyên krîtîk ên li nava NATO’yê bêne hiştin.
Serokê DYE’yê Donald Trump hevalbendên xwe bi rengekî tund rexne kiribû ku di dema krîza bi Îranê re ji bo jinûve vekirina Tengava Hurmuzê piştgiriya têrker a leşkerî nedane. Trump beriya niha jî vekişîna ji NATO’yê xistibû rojevê.
Li aliyê din welatên weke Qraliyeta Yekbûyî û Fransayê ragihandin ku tevlîbûna li operasyonên leşkerî yên DYE’yê yên li ser Îranê wê bê wateya tevlîbûna yekser a li nava şer, lewma helwesteke dûrmayinê nîşan dan.
BERSIVA SANCHEZ: EM LI GORÎ E-MAIL’AN NAXEBITIN
Serokwezîrê Spanyayê Pedro Sanchez roja Înê di civîna bilind a lîderên Yekîtiya Ewropayê de ya li Qibrisê pêk hat, di axaftina destpêka civaînê de bersiveke bi vî rengî da mijarê:
“Em li gorî e-mail’an naxebitin. Em li gorî belgeyên fermî û beyanên helwestê yên hikumeta DYE’yê dixebitin.”
Sanchez got, “Helwesta hikumeta Spanyayê eşkere ye: Hevkariya tam a bi hevalbendên xwe re, lê her tim di çarçoveya hiqûqa navneteweyî de.”
Madridê li hemberî çalakiyên Washingtonê yên li Rojhilata Navîn helweseteke rexnekirinê nîşan da.
Hikumeta Spanyayê ya bi lîderiya Pedro Sanchez gelek caran li ber şerê DYE û Îsraîlê yê li ser Îranê rabû.
