26’ê Nîsanê Platforma Çalakiyên Hevbeş a Tevger û Rêxistinên Jinan li Rojava kampanyaya piştgiriya bi Yekîneyên Parastina Jin (YPJ) re ragihand. Di çarçoveya vê kampanyayê de ji Rojhilata Navîn û cîhanê rêxistinên jin û kesayetan bi name û daxuyaniyan piştgirî didin kampanyayê.
Yek ji rêveberê Akademiya Şehîd Deştî û Gaziyan Egîd Efrîn têkildarî mijarê axivî. Egîd Efrîn anî ziman ku weke gaziyan heya dawiyê piştgiriyê didin kampanyaya ji bo qebûlkirina statuya YPJ’ê û got, “Bêguman bêyî tevlîbûna YPJ’ê ji artêşa Sûriyeyê ya nû re, ne mimkun e em behsa Sûriyeyeke ku tê de hevgirtin, edalet û mafê gelan hebe bikin. Ji ber YPJ, temsîliyeta tevahî gelan û jinan dike. Lewma neqebûlkirina YPJ’ê tê wateya neqebûlkirina îrade û mafên gelan û tevahî jinan.”
Egîd Efrîn destnîşan kir ku yek ji taybetmendiya herî bedew, însanî û demokratîk a şoreşa Bakur û Rojhilatê Sûriyeyê hebûn, sekn, têkoşîn û fedakariya şervanên YPJ’ê ye û wiha domand, “YPJ weke hêzeke hemû jinan tê naskirin. Temsîliyeta xeta azadiyê, wekheviyê, edalet û demokrasiyê dike. YPJ li ser esasê xeta parastina rewa, ji bo mafên jinan û tevahî gelan têkoşîneke di asta herî bilind de pêş xist. YPJ, bi qasî hêzeke leşkerî ye, ewqasî jî hêzeke îdeolojîk, demokratîk û aştiyê ye. YPJ bi van taybetmendiyên xwe îro jî dikare ji bo tevahiya gelên Sûriyeyê bi roleke pir mezin rabe. Ji bo Sûriyeyeke hevgirtî û xurt hebûna YPJ’ê heyatî û dîrokî ye.”
Egîd Efrîn têkildarî têkbirina çeteyên DAÎŞ’ê de bal kişand ser berxwedana şervanên YPJ’ê û ev anî ziman, “Şervanên YPJ’ê di gelek şeran de berdêlên pir mezin dan. Li dijî hêzên paşverû yên weke DAÎŞ’ê û hevalbendên wê, fermandar û şervanên YPJ’ê pêşengî kirin. Di gelek şeran de em bûn şahidê vê. Me ji sekn, moral, cesaret û hêza YPJ’ê îlham digirt. Lewma neqebûlkirina YPJ’ê ya di nav artêşa Sûriyeyê ya nû de nayê pejirandin. Neqebûlkirina YPJ’ê, tê wateya neqebûlkirina îradeya jinan û tevahî gelan. YPJ temsîliyeta tevahî jinan û gelên bindest dike. YPJ hêza parastina tevahî jinan û gelên bindest e. Di nav artêşa Sûriyeyê û destûrê de cihgirtina YPJ’ê wê Sûriyeyê bi hêz bike. Pirrengî, bedewî û rengîniya şoreşê bi hebûna YPJ’ê û fedakariya şervanên jin pêk hat. Ti kes nikare vê înkar bike. Ev jî cudatiya Şoreşa Bakur û Rojhiatê Sûriyeyê ya ji şoreşên din nîşan dide. Lewma taybetmendiyên civakî û demokratîk ên şoreşa me li pêş in.”
Egîd Efrîn da xuyakirin ku entegrasyona demokratîk wê bi qebûlkirina hebûna YPJ’ê ya di nav artêşa Sûriyeyê û destûrê de karibe bi ser bikeve û wiha domand, “Em heya dawiyê piştgiriya YPJ’ê dikin. Em Sûriyeyeke bê YPJ qet qebûl nakin. Entegrasyona demokratîk bi tevlîbûna YPJ’ê dibe. Bê tevlîbûna YPJ’ê entegrasyoneke demokratîk çênabe. YPJ pêşengtiyê ji şoreşê re dike. Şervanên YPJ’ê keçên vî gelî ne. Parastina nirxên jinan, gelên Sûriyeyê û mirovahiyê dikin. Bi hezaran şervanên leheng ên YPJ’ê di şerê li dijî dagirkeriyê û çeteyên DAÎŞ’ê de şehîd û birîndar bûn. YPJ ji kesî ti heq û mafî naxwaze. Jixwe bi berdêl û serketinên xwe hebûna xwe mayînde û misoger kiriye. Hebûna YPJ’ê temînata ewlehiya hemû jinan e. Li ser vî esasî em weke hevalên gaziyên şer li rex YPJ’ê cih digirin. Ji bo qebûlkirina hebûna YPJ’ê ya di nav artêşê û destûra bingehîn de em ê jî heya dawiyê têkoşîna xwe bidomînin.”
