Amedspor ku di sala 1976’an de bi navê Melîkahmetspor ava bû, di nava salan de bû Diyarbakir Belediyespor û Diyarbakir Buyukşehir Belediye Diskispor, rabirdûya xwe ya têr û tijî bi derbasbûna li nava Lîga Super tacîdar kir.
Kulûb ku bi piştgiriya şaredariyê ji lîgên jêrîn bilind bû, di sala 2014’an de navê “Amed Sportif Faaliyetler” li xwe kir. Ev nav di heman demê de bû mohrek. Amedspor li gel zehmetî, zext û êrişên nijadperestî jî têkoşîna xwe ya li qadê dewam kir û niha derbasî Lîga Super bû. Bi vî rengî mohra xwe danîn binê serketineke dîrokî.
Serokê Kulûba Amedsporê Nahît Eren ji ANF’ê re axivî.
‘ŞAMPIYONIYÊ COŞEKE MEZIN LI HERÊMÊ AFIRAND’
Nahît Eren destnîşan kir ku şampiyoniya Amedsporê ne tenê serketineke sportîf e û hestên xwe vegot: “Hesteke bêhempa ye. Piştî ku şampiyoniya me bi maça Igdirê diyar bû, li seranserê herêmê, li bajarên me hemûyan coşeke gelekî mezin afirî. Vê yekê nîşan da ku me encamek bi dilê civaka xwe bi dest xistin. Hesteke mezin bû; ji ber ku zexteke giran li ser me hebû, streseke gelekî mezin hebû. Sedema vê jî ew bû ku bendewariya civakê îsal gelekî zêde bû ku Amedspor derbasî Lîga Super bibe. Me bersiv dan vê bendewariyê, lewma em gelekî rehet bûn.”
‘EV SERKETIN BERHEMA GEL Û ALÎGIRAN E’
Eren serketina ji bo çûyîna Lîga Super weke encama kedeke kolektîf pênase kir û bi taybetî işaret bi rola alîgiran kir: “Rêwîtiya ku bi salan bi rêeberiya Amedsporê, bi tîmên teknîkê û bi lîstikvanên xwe ji lîgên jêrîn destpê kir, îro bi Lîga Super tacîdar bû.
Ez spasiya her kesî dikim ku di vê demê de ked dan. Lê belê spasî û pîrozkirina herî mezin heqê vî gelî ye, heqê van alîgiran e. Di nava her şert û mercî de xwedî li tîma xwe derketin, stad dagirtin û l deplasmanan jî bi tenê nehiştin. Lewma para herî mezin a vê serketinê ya wan e. Ev serketineke kolektîf e lê belê yekbûna li dora hev a civakê faktora diyarker e.”
‘AMEDSPOR NE TENÊ KULÛBEK E’
Eren diyar kir ku Amedspor kulûbeke sporê a klasîk nîne û got, “Em Amedsporê ji tîmekê bêhtir dibînin. Ji ber ku ev kulûb ji xaka lê ava bûye cuda nîne. Ti carî xwwe ji nirxên civakê, xwe ji pirsgirêkên civakê venegirt. Spor di heman demê de yek ji wan qadan e ku piştevaniya civakî lê tê dîtin. Em alîgirên xwe ne tenê weke temaşevanên maçê dibînin, em alîgirên xwe weke dengê wijdanê civakê dibînin.
Em bûn kulûbeke welê ku dem hebû me kuştina zarokan xist rojevê, dem hebû me tundiya li hemberî jinê kir rojev. Feraseteke me heye ku li ber tundî û sixêfan radibe. Lê mixabin ev sekna me dem bi dem bi rengekî cuda hate fêhmkirin; kulûba me krîmînînalîze kirin û êrişên nijadperestî lê hate kirin.”
‘LI GEL CIHÊKARIYÊ JÎ ME DEST JI TÊKOŞÎNÊ BERNEDAN’
Eren bal kişand ser qedexeyên li deplasmanê û êrişên nijadperestî yên ku li hemberî wan hatin kirin û axaftina xwe bi vî rengî dewam kir: “Gelek carna cihêkarî li Amedsporê hate kirin. Li deplasmanê destûr ji alîgirên me re nehate dayin ku bikevin stadê. Bi salan qedexeyên ku li cîhanê kêm caran hatiye dîtin li ser me hate ferzkirin. Li bajarên ku em diçûn wan deveran motîvasyoneke dijber dihate afirandin û weke ku em ji welatekî cuda hatine nêzîkatî dihate nîşandan. Ev rewşeke cihêkar bû.
Lê belê me li gorî pêvajoya ku welat di nav de li ber çavan girt û ji bo dijberiyê mezin nekin gelek tiştk mezin nekir. Li gel vê yekê jî me dest ji têkoşîna xwe bernedan û îro ev serketin bi dest xist.”
‘JI BO LÎGA SUPER DEM KÊM E, BERPIRSYARÎ MEZIN E’
Eren ragihand ku armanca wan a li nava Lîga Super ne tenê mayina li nava lîgê ye û axaftina xwe bi van gotinan qedand: “Amedspor kulûbeke ciwan e. Di Lîga Super de hin tîm hene ku temenê xwe sed salî ye. Ev lîg ji avaniya aboriyê heta bi kalîteya kadro asteke gelekî cuda ye. Ji binesaziyê heta bi tesîsan divê em xwe amade bikin. Lê belê demeke dirêj li pêşiya me nîne, lîg wê meha Tebaxê destpê bike.
Lewma ne tenê rêveberî, divê bajar bi temamî bi berpirsyariyê rabe. Amedspor xwedî bingeheke welê ye ku mînaka wê li Tirkiyeyê kêm e. Ji civaka sivîl heta bi rêxistinên pîşeyî mekanîzmayeke xwe ya şêwirmendiyê ya berfireh heye. Şert e ku em bi dînamîkên bajêr hemûyan re xwe ji vê pêvajoyê re amade bikin.
Em dixwazin ne tenê li Lîga Super mayinde bibin; em dixwazin xwe bigihînin rêzên jorîn û li Ewropayê vî bajarî temsîl bikin. Ev wê ne karekî hêsan be, haya me ji vê heye. Lê belê Amedsporê di demeke kurt de tecrûbeyeke girîng bi dest xist. Em ê bi aqlekî kolektîf, bi feraseteke ku her kes bi berpirsyariyê radibin rêwîtiya xwe dewam bikin.
Ev kulûb ji xwe re dike armanc ku li her derê ya herî baş bike. Ez bawer im ku Amedspor wê li Lîga Super performanseke serketî nîşan bide ku hêjayî wê ye.”
