Alîkarê Hevserokatiya Meclîsa Rêveber a Rêveberiya Xweser a Bakur û Rojhilatê Sûriyeyê Hesen Koçer têkildarî salvegera Şoreşa Rojava û geşedanên dawî yên li Sûriyeyê ji ajansa me re axivî.
Hesen Koçer di destpêka axaftina xwe de hemû şehîdên şoreşê bi rêzdarî bi bîr anî û got, “Felsefeya esas a vê şoreşê bi paradîgmaya Rêber Apo pêş ket. Bi tarzê şoreşên kevin pêş neket, ne bi rengê ez ê deshilatdariyê û dewletê bi dest bixim bû. Li ser pîvanên Rêbertî pêş ket. Şoreş ne hilweşandina dewletekê û li şûna wê avakirina dewletekê ye, civak divê xwe rêxistin bike. Pîvana esas a şoreşê ev e. Divê ji nava civakê sîstemek demokratîk were pêşxistin û di esas de me ev yek armanc kir.”
Hesen Koçer ev tişt jî got: “Guhertina çêbûyî li ser bingehê prensîbên şoreşê; li ser esasê pêşengtî û azadiya jinê rêxistinkirina civakek demokratîk, ya duyem jî; pêşxistina civaka ekolojîk bû. Li ser vê esasê şoreş pêk hat. Li ser vê esasê her çendî ku nebesî hebin jî, komunan xwe rêxistin kirin, rêxistinbûnên meclîsan xwe pêş xistin, rêveberî hate avakirin. Piştre ji bo têkbirina vê şoreşê, êrîşî me hate kirin. Ji sala 2013’an ve êrîş qet nerawestan. Me netewperestî û şovenîzma rejîma Baas şikand. Gelên Kurd, Ereb û Suryanî bi hev re di yek eniyê de şer kirin, xwîna wan bû yek.”
Koçer bal kişand ser bandorên şoreşê yên li ser Sûriyeyê û got, “Niha her kes dibêje, ‘ev şoreş dikare me rizgar bike’. Ji ber ku sîstema heyî yekperest e. Sîstemeke olperest û yekperest li Sûriyeyê tê pêşxistin. Hemû gelên Sûriyeyê dibêjin, ‘Divê em modela Rêveberiya Xweser û Şoreşa 19’ê Tîrmehê ji xwe re esas bigirin’. Sedemê hilweşîna rejîma Baas ew bû ku navendî bû. Eger di navendîbûnê de israr were kirin, li Sûriyeyê aramî çênabe. Em dixwazin bi Ereb, Durzî, Elewî û gelên din re eniyeke demokratîk pêş bixin. Gelê Sûriyeyê yekgirtî ye, divê bi hev re eniyeke demokratîk ava bike.
Şoreşa 19’ê Tîrmehê ne tenê li Sûriyeyê, li seranserî cîhanê hêvî afirand. Gelek enternasyonalîst beşdarî şoreşa Rojava bûn, gelek di hêzên leşkerî de cih girtin, şehîd bûn, hîna jî beşek wan di şoreşê de cih digirin. Ev, nîşan dide ku modela me ya şoreşê modeleke nû ye. Gelên li Ewropayê ji vê yekê bandor bûn, ne tenê gelên Rojhilata Navin. Lewma em vê şoreşê çiqas pêş bixin, bandora wê dê ewqas mezin be.”
Koçer bal kişand ser êrîşên di demên dawî de li ser Durziyan pêk tên û destnîşan kir ku gelê Sûriyeyê li hemberî van êrîşan bi hêrs e. Koçer anî ziman ku bi vî rengî hikûmet nayê avakirin û ev tişt bilêv kir: “Em êrîşên li Siwêdayî li hemberî Durziyan tên kirin, qebûl nakin û şermezar dikin. Lewma em piştgirî didin gelê Siwêdayê. Divê çand û sîstema wan were parastin. Durzî jî xweseriyê dixwazin, hemû jî Durzî ne, di nava wan de ti kes biyanî nîne. Divê xweserî û taybetmendiyên wan bên esasgirtin. Durzî divê bi tarzekî girêdayî dewletê, xwe bi rêve bibin.”
Hesen Koçer ragihand ku bi geşedanên qewimî re, DAÎŞ xwe li herêmê car din rêxistin dike û sivîlan şehîd dixe û diyar kir ku ew ê li dijî vê yekê xwe biparêzin, lê divê koalisyona navneteweyî jî berpirsyariyên xwe bi cih bîne.
Koçer îşaret bi pêvajoya aştî û civaka demokratîk a li Bakur û Tirkiyeyê jî kir û got, “Her gaveke li Tirkiyeyê were avêtin, wê yekser bandorê li Rojava jî bike. Mesela me tenê têkildarî Rojava ye, divê Kurd bibin xwedî kongreyeke neteweyî ya giştî. Berê jî bangên Rêbertî hebûn, di manîfestoyê de jî Rêbertî behs dike ku wê yekîtiyeke çawa ya Kurdan hebe. Ji bo Kurdan kongreyeke neteweyî pêwîst e.”
Hesen Koçer bal kişand ser rola jin û ciwanan a di şoreşê de û got, bi pêşengiya jin û ciwanan dê şoreş bi ser bikeve. Koçer destnîşan kir ku divê ciwan manifestoya Rêber Apo baş fêm bikin û got, di civakekê de jin û ciwan çiqas bi rêxistinkirî û azad bin, ew civak jî ewqasê bi rêxistinkirî û azad e.
