Federasyona Rêxistinên Civaka Sivîl rapora xwe ya salane li ser pirsgirêk û astengiyên li pêşa azadiya rojnamegerî û mafên mirov ya 12 salên borî belav kir.
Di raporê de hat diyarkirin ku metirsiya herî mezin li ser Herêma Kurdistanê sekinandina sîstematîk a saziyên Herêma Kurdistanê ye ku çavkaniya yasadanînê ne.
Di raporê de hatiye gotin: “Tevî ku hilbijartina dema şeşem a parlamentoyê di Cotmeha 2024’an de pêkhatiye jî lê heta niha parlamento ji ber nakokiyên navbera PDK’ê û YNK’ê girtî maye.”
Behmen Baban ku rapora federasyonê xwend, got: “Me di rapora xwe de behsa wê yekê kiriye ku çawan yasaya ‘têkdana ewlehiya Herêmê’ û ‘Yasaya xirab bikaranîna amêrên ragihandinê’ ji bo cezakirina rojnameger û çalakvanan tê bikaranîn. Dosya girtiyên Behdînanê tenê mînakek ji dehan dosyên dine ku dadgeh têde wek amrazek siyasî tê bikaranîne.”
Her wisa bal kişand ser rewşa welatiyên Herêma Kurdistanê û da zanîn ku civaka sivîl li Herêma Kurdistanê di navbera du keviran de ye û wiha dewam kir; “Sînordarkirina darayî û dorpêça ewlehiyê, partiyên desthilatdar stratejiya “rêxistinên siber” danîne pêşiya xwe. Zêdetirî 6 hezar rêxistin hene. Lêbelê, budçe, agahî û projeyan ji bo çend rêxistinên partî û malbatî hatine sînordarkirin.”
Her wisa di raporê de rewşa xirab a welatiyan û xetereyên taybetkirina xizmetgûzariyên tenduristî, perwerde û jîngehê destnîşan dike û wê wekî hilweşîna xizmetgûzariyan û karesatek di sektora tenduristiyê de binav dike. Dibêjin, “Tiştê ku herî zêde fikar dike encamên vê rewşê li ser jiyana rojane ya welatiyanin.”
Di dawiyê de, Federasyona Rêxistinên Civaka Sivîl çend pêşniyarên lezgîn ji saziyên Herêma Kurdistanê re kirine, ku yên herî girîng evin:
-Parlamentoya Herêma Kurdistanê: Demildest dawî li “rûniştina vekirî” bînin, hikûmeteke nû ava bikin û rewatiya saziyên çavdêriyê vegerînin.
-Serbixwebûna dadwerî: Divê dadgeh û dozger ji serdestiya partiyan rizgar bibin. Qanûna ewlehiyê divê ji bo bêdengkirina rojnamevanan neyê bikaranîn.
-Kontrola bazarê: Divê sektora dermanan û pêdiviyên bingehîn ji destê şîrketên partîzan bên girtin û jiyana mirovan ji bo qezenca bazirganî neyê fedakirin.
