Di qonaxa niha ya pêvajoya Aştî û Civaka Demokratîk de Tirkiyeyê cara ewilî sererastkirineke hiqûqî anî Meclîsê. Qanûna bi navê “Xurtkirina Yekbûna Civakî û Piştevaniya Mîllî” di dîroka dewleta Tirk de weke destpêkek tê nîşandan.
Bi qanûnê re Tirkiye cara ewilî bi tevgera Kurd re rûnişt û qebûl kir ku di nava muzakereyeke vekirî de ye. Li gel vê yekê piştî qanûn hate eşkerekirin, gelek nîqaş jî bi xwe re anîn.
Serokê Giştî yê Partiya Tevgera Kedkar (EHP) Hakan Ozturk têkildarî qanûnê ji ajansa me re axivî.
‘TÊKOŞÎNA MAFÊ YA GELÊ KURD HATIYE QONAXEKE GIRÎNG’
Ozturk anî ziman ku bi qanûnê re gaveke dîrokî hate avêtin û diyar kir ku di qada hiqûqî de jî bi qanûnê re destpêkek pêk hat. Ozturk got, “Di qanûnê de dibêje ku cezayên tên pêşbînîkirin, wê bên taloqkirin. Em dikarin vê weke rakirina astengiyên li pêşiya rêya xwe, bibînin.
Têkoşîna mafê ya gelê Kurd mijar aniye qonaxeke girîng. Bi saya wê têkoşînê em ti carî ji sifirê destpê nakin, em ji cihê mayî dewam dikin. Gelê Kurd digot, ‘Abdullah Ocalan îradeya min e, ew temsîla me dike û divê ew muzakereyan bimeşîne’, ev jî pêk hat.
‘QANÛNÊ DIVÊ HER KES GIRTIBA NAVA XWE’
Ozturk bilêv kir ku di qanûnê de kêmahî hene û got, “Helbet kêmahî hene, lê ji bo destpêkirinê tespîtkirina xaleke ‘bêqisûr’ ne pêkan e. Divê qanûn bi giranî têkildarî înfazê ba, divê her kes girtiba nava xwe, divê astengiya siyasî neanîba, divê têkildarî rewşa Abdullah Ocalan guhertineke zelal afirandiba û mafên xwezayî yên gelê Kurd rasterast girtiba dest.”
Ozturk ragihand ku nîqaşên referandûmê yên hin derdoran, pêwîst nake cidî bên girtin û ev tişt anî ziman: “Bi muzakereyan em hatin xaleke diyar, metot ev e.”
‘REWŞA SIYASÎ WÊ BI VÊ QANÛNÊ RE WERE GUHERTIN’
Ozturk destnîşan kir ku qanûn destpêkek e, têkoşîn hîna didome û bal kişand ser girîngiya civakîbûna aştiyê. Ozturk got, “Niha derfetên me yên ji bo îknabûnê, hîn zêdetir in. Rewşa siyasî wê bi vê qanûnê re dest bi guhertinê bike. Nabe ku statuko weke heyî, were domandin.”
