Di dîroka Kurdistanê de gelek çîrok û destan hene ku bi keda têkoşerên azadiyê hatiye nivîsandin. Bi taybetî gelek şervan hene ku ji neteweyên cuda bi bandora tevgera azadiyê û hebûna xwe tevlî vê tevgerê bûne. Yek ji van gerîlayan jî Elîşêr Koçer ê ji gelê Suryanî ye. Destpêkê şerê Kobanê, piştre jî çalakgerên fedaî heval Êriş û Andok gelekî bandor lê kir. Ev yek jî bû wesîle ku berê xwe bide Tevgera Azadiyê û beşdarî nava refên gerîla bibe.
Elîşêr Koçer li ser sedema tevlîbûna xwe got, “DAÎŞ ku îdîa dikir ku bi navê Îslamê tevdigere dema ku êrişî Kobanê kir, lêgerîna azadiyê ya di dilê min de xurtir bû. Ji ber ku ez di temenê ciwantiyê de bûm û lêgerîna min a li jiyaneke ewle û azad hîn bêhtir li pêş bû. Min zanîbû ku sîstema em di nav de ne sîstemeke ku ji çanda mirovahiyê dûr ketiye. Mirov weke heywanan didît û em ji mafên me yên mirovî dûr dixist. Hesta serweriyê dibû sedem ku mirov ji çanda xwe dûr bikeve; min ev yek qebûl nedikir. Ji ber vê jî her tim di nava lêgerîna azadiyê de bûm.”
Gerîla Elîşêr Koçer axaftina xwe bi vî rengî dewam kir, “Min ti carî zilm û serîtewandin qebûl nekir. Her tim xwest ku bibim şervanê gelê xwe. Koma şehîd Xebat Dêrik ku di avakirina şoreşê de bi roleke bingehîn rabû, bandoreke mezin li min kir. Bi taybetî sembola serketin û berxwedanê heval Arîn Mîrkan, heval Gelhat û Peyman kirin ku ez gavên xwe hîn bi lez biavêjim. Wê demê hevalên Êriş û Andok jî çalakiya fedaî kiribûn. Çalakiyên ku van herdu fedaiyan kirin ji rêzê nebûn. Bi taybetî gotina ‘Em dixwazin zarokên vî gelî bi lehengî bijîn’ a wan, dibû sedem ku mirov xwe jinûve biafirîne. Van herdu fedaiyan guhertineke mezin di jiyana min de çêkir. Çalakiya wan bû sedem ku bixwazim weke wan bi fedaîtî bijîm û tenê xizmetê ji gelê xwe re bikim.
Gerîla ji bo min evîn e, fedaîtî ye. Gerîla ji bo jiyana gelê xwe têdikoşe. Ji ber vê jî em dibêjin ku gerîlatî fedaîtî ye. Lêgerîna min ji bo wê ye ku xwe bigihînim xeta Rêber Apo. Ji ber ku Rêber Apo rêberê gelan e û xwe ji bo gelan feda kiriye. Fikrê Rêbertî fikrekî gerdûnî ye. Li ser vê bingehê bang li ciwanan hemûyan dikim ku xwe bigihînin fikrê Rêber Apo û bi vî fikrî li cewhera xwe vegerin.”
