Ji bo gerîlayên têkoşîna azadiyê ya Kurd ku dema dawî şehadeta wan hate eşkerekirin, li gelek bajarên Kurdistan, Tirkiye û Ewropayê taziye tê danîn, bîranîn têne lidarxistin. Ji bo Rojgirav Amed (Mursel Nergiz) ku 13’ê Adara 2020’î li Metînayê şehîd bû, li Amedê taziye hate danîn û bîranîn hate lidarxistin.
Rojgirav Amed, Felat Amed (Yuksel Nergiz) û Îlhan Amed (Tarik Nergiz) di dem û herêmên cuda de şehîd bûn. Dayika hersê şehîdan Refîka Nergiz diyar kir ku ew bi hersê kurê xwe re serbilind e ku di têkoşîna azadiyê ya Kurdistanê de şehîd bûn. Dayika 3 şehîdan Refîka Nergiz ji malbatan hemûyan, gerîlayên Kurdistanê û Rêber Apo re sersaxî xwest û got, “3 kurên min şehîd bûn. Destpêkê Îlhan çû û piştî ew şehîd bû Felat çû. Beriya Felat şehîd bibe Rojgirav çû. Ez li gund bûm, Rojgirav beriya biçe li navenda Amedê bang li min kir. Ji min re got ku wê biçe. Ji xwe beriya wê hatibû girtin, nêzî 40 rojî êşkenceyên giran lê hatibû kirin. Piştî ku ji girtîgehê derket ji min re got, ku wê biçe. Min bawer nekir.
Em 15 rojan li Amedê bi hev re man. Ji min re got, ‘Min soz da, ez êdî nikarim li vir bimînim, nikarim careke din bikevim girtîgehê, nikarim xwe li ewqas êşkenceyê rabigirim. Min biryara xwe da, ez ê biçim’. Min jî got, madem tu yê bi rastî biçe ez ê te bi rê bikim. Bavê wî, xwişka wî û birayê wî Alî ku niha girtî ye, li gund bûn. Ez jî heta çûyînê li gel Rojgirav mam. Bi gotina ku wê biçe derveyî welat xatir ji hemû xizm û hevalên xwe xwest, lê belê ji min re gotibû ku wê biçe gerîla. Çûyîna kurê min ê sêyemîn jî li min giran hatibû, lê belê min bi destê xwe ew bi rê kir. Çend caran jî ez çûbûm û min ew dîtibû. Rojgirav gelekî bi aqil bû, zane bû. Piştî ku min serdana wî kir, bavê wî li rewşa wî pirsî, min jî jê re qalê kir. Wê rojê xwîn çû ser mejiyê wî. Li Amedê li nexweşxaneyê ma, piştî 3 rojan jiyana xwe ji dest da.
Xizmên min gotin, em li gund taziyeyê dînin, min jî got, na. Kurê min hez ji hevrêyên xwe, civaka xwe dikir, ji ber wê jî em ê li gel hevrêyên wî taziyeya wî dînin. Bila êdî dilê ti dayikê neşewite. 3 kurên min şehîd bûn, hersê jî di dilê min de ne. Ez bi wan serbilind im. Înşaleh wê ji niha û pê ve aştî bê û malbat bigihêjin zarokên xwe.”
