Gazî Qehreman Rojava yê cara yekem di berxwedana Kobanê ya 2014’an de birîndar bibû têkildarî 1’ê Mijdarê Roja Kobanê ya Cîhanî axivî.
Qehreman destpêkê Roja Kobanê ya Cîhanê li tevahî malbatên şehîdan û gelên herêmê pîroz kir û got, “Beriya 12 salan li hember tarîtiyeke ku ji bo hemû cîhanê bibû belayeke mezin berxwedana şervanên YPG-YPJ pêş ket. Bi vê re ji hemû parçeyên welat ciwan hatin û ji bo di vê berxwedana pîroz de cih bigirin berê xwe dan Kobanê. Helbet sedem û planeke mezin a êrîşên li ser Kobanê hebûn. Çeteyan û hevalbendên wan dixwestin bi dagirkirina Kobanê re hêviyên azadiyê yên gelan têk bibin. Ji ber Şoreşa 2012’an hîmên wê hatin danîn hêvî, coş û moralekî mezin ji bo gelan û jinan çêkiribû.”
Qehreman bal kişand ser rola Rêber Apo ya di pêşxistina berxwedanê de û ev anî ziman, “Rêber Apo li Îmraliyê di hevdîtineke xwe ya bi parêzeran re got, ‘Ketina Kobanê tê wateya ketina Kurdistanê’ û xwest her kesên xwedî rûmet xwedî li Kobanê derkevin. Li ser vî esasî rewşeke seferberiyê ava bû. Li hember van êrîşan berxwedaneke bêhempa ya dîrokî pêk hat û ev xwesteka dagirkirinê di qirika êrîşkar û piştevanên wan de ma.”
Qehreman îşaret bi berxwedana fedaiyane ya jinan jî kir û wiha domand, “Bi sedan hevrêyên me yên jin di vê berxwedanê de bi roleke herî aktîf û hêja rabûn. Berxwedana Kobanê bi îradeya jinê bû sembola egîdî û lehengiyê. Ev têkoşîna mezin a di pêşengiya şoreşgerên weke Arîn de îro hêviya jiyana azad û wekhev şênbertir kiriye.”
Gazî Qehreman Rojava axaftina xwe wiha bi dawî kir, “Bi sedan hevrêyên me di vê berxwedana dîrokî de şehîd bûn. Dîsa bi dehan hevalên me birîndar û gazî bûn. 1’ê Mijdarê Roja Kobanê ya Cîhanê encama berxwedana dîrokî ya şehîdan e. Em minetdarên şehîdên xwe ne. Em weke hevalên gazî bi heman ruhê berxwedana Kobanê xebatên xwe dimeşînin. Em ê timî bi sekn û xebata xwe layiqî şehîdên xwe bin.”
