Bi pêşengiya Tevgera Jinên Azad (TJA) li Salona Konferansê ya Tahîr Elçî ya Baroya Amedê civîneke çapemeniyê hate lidarxistin. Nûnerên jin ên sazî û rêxistinên civaka sivîl ên li bajêr beşdarî civînê bûn. Pankarta bi nivîsa “Niha dema jinê ye” li salonê hate daliqandin.
Aktîvîsta TJA’yê Ayla Akat Ata metna daxuyaniyê xwend û got, “Cografya me û Rojhilata Navîn li ber serdemeke dîrokî ya nû ye. Pirsgirêka Kurd a ku zêdeyî sed sal in bi polîtîkayên înkar, îmha, asîmîlasyon û şer hatiye kûrkirin, êdî divê bi rêbazên siyasî û demokratîk bê çareserkirin ku ev çareserî nema dikare bê taloqkirin. Qanûna çarçoveyê ya ku tê payin bikeve rojeva meclîsê, divê bibe gtava destpêkê ya vê dema dîrokî. Qanûna çarçoveyê dawî nîne; divê bib destpêka demeke nû ku hîmên civakî nîşan bide ku çareseriya demokratîk, hiqûqa aştiyê û pêvajoya veguherînê li ser bê rûniştandin. Weke TJA em zanin ku aştiya mayinde bi avakirina jiyaneke li ser esasê azadiya jinan dibe. Berpirsyariya me ya bingehîn e ku astengiyên siyasî û hiqûqî yên li pêşiya tevlîbûna jinan a li siyaseta demokratîk û qada civakî ji holê rakin, jiyaneke rêxistinbûyî, azad û wekhev ji bo hemû jinan, gelan û beşên civakî misoger bikin.
Di çareserkirina pirsgirêka Kurd û jiholêrakirina krîzên herêmî de divê stratejiya aştiyê ya Birêz Abdullah Ocalan û perspektîfa azadiya jinê li ber çavan bêne girtin. Sererastkirinên hiqûqî yên îro têne nîqaşkirin divê bi vê rewatiyê bêne nirxandin. Mercên azad ên karkirin û ragihandinê yên Birêz Abdullah Ocalan û pêkanîna azadiya wî ya fîzîkî ji bi pêşvebirina pêvajoyê dîrokî ye. Di qanûna çarçoveyê de divê bersiveke şênber ji vê rola wî re bê dayin.”
Di dawiya daxuyaniyê de ev helwest hate nîşandan: “Weke TJA em ê ji xeta xwe ya têkoşînê ya ku azadiya jinê dike esas, ji daxwaza xwe ya azadiya fîzîkî ya Birêz Abdullah Ocalan û ji israra xwe ya hiqûqeke aştiyê ya ku jinan weke hêmana damezrîner dibîne, venegerin. Em radigihînin ku em ê qanûna bê derxistin û pêvajoya bicihanîna wê bi biryardarî bişopînin û bi vê berpirsyariya dîrokî têkoşîna xwe mezin bikin.”
