Emîn Ay li şûna Dogan Hatun ê ku di çarçoveya “Rêgeza Paşvekişînê” de ji peywira xwe yaHevşaredariya Bajarê Mezin a Amedê îstifa kiribû, hat peywirdarkirin. Di daxuyaniya ku ji aliyê Desteya Rêveberiyên Xwecihî yên Demokratîk a DEM Partiyê hat dayî de hat diyarkirin ku pêvajoya diyarkirina hevşaredarê nû, bi wergirtina nêrîn û pêşniyarên Meclisa Şaredariya Bajarê Mezin a Amedê, rêxistinên bajar û navçeyan û saziyên demokratîk ve hat meşandin.
Di daxuyaniyê de hat destnîşankirin ku pêvajoya diyarkirina hevşaredar li gorî usul û esasên ku di Belgeya Helwesta Rêveberiyên Herêmî yên Demokratîk de hatiye diyarkirin, li ser bingeha “aqilê hevpar û vîna kolektîf” hat meşandin.
Di daxuyaniyê de hat bibîrxistin ku pêşniyarên di encama hevdîtinan de derketine holê bi lijneyên partiyê re hatine nirxandin û wiha hat gotin: “Di vê çarçoveyê de wê ji îro pê ve Emîn Ay peywira Hevşaredariya Bajarê Mezin a Amedê bimeşîne.”
Di daxuyaniyê de hat diyarkirin ku hevserokatî ne tenê modelekî rêveberiyê ye, di heman demê de mekanîzmayeke demokratîk e ku tevlibûna rasterast a civakê ya rêveberiyê xurt dike û vîna gel dixe navenda pêvajoyên biryardayînê ye.
Hat diyarkirin ku wê di serdema nû de jî feraseta şaredariya ku vîna gel, aqilê hevpar û tevlîbûna demokratîk esas digire bê berdewamkirin û ji Emîn Ay re serketin hat xwestin.
