Tevî malbatên dîlgirtiyan, bi sedan şêniyên bajarê Dirbêsiyê bi daxwaza dîlgirtî werin azadkirin û cenazeyên şehîdan werin radestkirin, meşek li dar xist.
Girseyê pankartên “Ji dîlgirtiyan re azadî” û “Dîlgirtiyan azad bikin” vekirin û ji Çerxerêya Serêkaniyê dest bi meşê kir.
Meş li Sûka Navendî ya bajar sekinî. Li wir ji rêveberên Kongra Star Silava Simo bi zimanê kurdî û endama Meclisa Malbatên Şehîdan Neda Hisên bi zimanê erebî daxuyanî xwend.
Di daxuyaniyê de berdewamkirina ragirtina dîlgirtiyan hate şermezarkirin û hate gotin doza dîlgirtiyan doza rûmet û hebûnê ye. Hate destnîşankirin ku dîlgirtiyansûc nekiriye, lê ji bo parastina gelê xwe li refên pêş bûn, loma dîlgirtina wan zilm û neheqî ye.
Di dewama daxuyaniyê de hate gotin, li gorî agahiyên ku dîlgirtiyên hatine azadkirin dane, li dîlgirtiyan êşkence û muameleya dermirovî tê kirin.
Hate gotin, girîngiya doza şehîdan jî ji doza dîlgirtiyan ne kêm e û bê şert daxwaza radestkirina cenazeyên wan hatin kirin û ev tişt hat gotin: “Şehîd pîroz in, xeta sor in, nabe werin derbaskirin, ew rûmeta gelan in.”
Di daxuyaniyê de ev bang hate kirin: “Divê demildest û bê şert hemû dîlgirtî werin berdan, divê tevahî cureyên binpêkirin û êşkenceyên di girtîgehan de werin rawestandin. Divê lêkolîneke navneteweyî û serbest li ser binpêkirinên li dijî girtiyan were vekirin, divê rê were dayîn ku rêxistinên navneteweyî giritîgehan ziyaret bikin û rewşa dîlgirityan bibînin. Divê cenazeyên şehîdan radestî malbatên wan bên kirin.”
