Bi armanca piştevaniya ji bo berxwedana li Rojavayê Kurdistan û gelên Îran û Rojhilatê Kurdistanê, xwendekarên ji Rojhilatê Kurdistanê yên li Zanîngeha Koye dixwînin, çalakiyek lidarxistin.
Di çalakiyê de yek ji serpereştyarên çalakiyê Agrîn Mihemedî di daxuyaniya çapemeniyê de daxuyaniyek da.
Agrîn Mihemedî diyar kir ku wek xwendekarên Rojhilatê Kurdistanê ku niştecihên Başûrê Kurdistanêne, ji bo piştevaniya xwe ji hemnîştîmanên xwe yên Rojava û Rojhilatê Kurdistanê nîşan bidin li vir kom bûne.
Di dewamê de Agrîn Mihemedî wiha anî ziman: “Em yek bedenin. Her xwîna ku ji laşê me tê rijandin xwîna Kurdistanê ye. Divê em li her deverê cîhanê li dijî her cure êrişeke li dijî gelê xwe helwest nîşan bidin û li hember rawestin. Em bang li civaka navneteweyî dikin ku li hember binpêkirinên li Rojhilat û Rojavayê Kurdistanê li dijî gelê Kurd têne kirin bêdeng nemînin.”
Her wiha Mamosteyê Zanîngeha Koye Mihemed Ebdulrehman di dema çalakiyê de ji Rojnews’ê re axivî û got: “Em dijminên xwe nas dikin û dizanin ku kîne rojane êrişî Kurdan dikin. Ez bang li hemû welatiyên Kurdan dikim, bi navê ol û siyasetê nebine dijminê netewa xwe. Ger Kurd yekgirtî bin, tu hêzek li cîhanê nikare li hember gelê Kurd bisekine. Ji ber vê yekê, di vê qonaxê de ji bo em li hemberî dijminan bisekinin pêwîstiya me bi yekîtî û hevgirtinê bêhtir heye.”
