Hevserokê Kongreya Neteweyî ya Kurdistanê (KNK) Ahmet Karamûs salvegera hilweşîna rejîma Baas a li Sûriyeyê nirxand û anî ziman ku ji bo Kurdan gelekî girîng e ku pêvajoya li Sûriyeyê rast bê xwendin. Karamûs got, şoreşa ku destpêkê bi daxwaza demokratîk bi rê ket, bi destwerdana hêzên herêmî û navneteweyî ber bi xeteke radîkal ve hate kişandin û hişyarî da ku ev rewş li ser destketiyên Kurdan rîskeke mezin e.
Hevserokê KNK’ê ragihand, di dema tevlîheviya li Sûriyeyê de li qadê 2 blok hebûn; yek jê bloka Îslamî-radîkal a din jî bloka sekuler, demokrat û pêşverû bû û destnîşan kir ku Kurd ji destpêkê ve di nava bloka duyemîn de li ser bingeha demokrasî û azadiyê têkoşiyan.
Karamûs qala ‘dizîna’ vê şoreşê kir û got, “Hêzên guherîner, çep û demokratîk ên ku xwedî înîsiyatîfa pêvajoyê bûn bi rêk û pêk hatin tasfiyekirin. Derdorên ku li hemberÎ rejîma Esad berxwedana destpêkê bi rêxistin kirin, li derve hatin hiştin û têkoşîn li ser komên Îslamî yên radîkal hate dewamkirin. Ji ber ku hêzên herêmî û navneteweyî bi zanebûn piştgirî dan van hêzan, ew li ser piyan hiştin û bi rê ve birin. Bi vî rengî cewhera pêşverû ya şoreşê hate bêbandorkirin û ber bi xeta radîkal-faşîst ve hate kişandin.”
‘KURD BI RÊYA SÊYEMÎN BÛN ALTERNATÎFA HERÎ XURT’
Karamûs diyar kir ku li gel zext û tasfiyekariyê jî Kurd li ser xeta demokratîk û şoreşger li ser piyan man, di xeta ku weke ‘rêya sêyemîn’ hate pênasekirin de Kurdan berxwedaneke ji modela civakeke alternatîf û pratîkeke rêveberiyê nîşan dan.
Ahmet Karamûs işaret bi pozîsyona xurt a Hêzên Sûriyeya Demokratîk (QSD) kir ku Kurd pêşengiyê jê re dikin û got, ev hêz xwedî tifaqên navneteweyî ye, demokratîk e, ji bo gelan bûye cihê baweriyê û bi têkoşîna xwe ya bi biryar a li hemberî komên radîkal bûye xwedî rewatiyeke cidî û prestîj. Karamûs destnîşan kir ku feraseta rêveberiya piralî ya Rêveberiya Xweser û QSD di wê astê de ye ku dikare ji bo jinûve avabûna tevahiya Sûriyeyê bibe modela rêveberiyê.
‘HÊZÊN HERÊMÎ Û GLOBAL MÎSYONEK DAN HTŞ’Ê’
Karamûs qala projeyên navneteweyî yên li pişt projeya hilweşîna rejîma Esad kir û bi bîr xist ku Îngilistan, Qatar û Tirkiyeyê di vê projeya hevpar de hêzên radîkal gihandin heta Şamê. Karamûs got, “Bi taybetî komên radîkal ên bi serkêşiya Heyet Tehrîr el Şam (HTŞ) bi rêk û pêk bi avantaj kirin. Hêzên herêmî û global mîsyoneke eşkere dan van rêxistinan; li Şamê kirin desthilatdar, pêvajoya dewletbûnê dan destpêkirin û rewa kirin.”
Karamûs diyar kir ku ev rewş weke projeyeke hevpar a bi piştgiriya Qatar, Erebistana Siûdî û Tirkiyeyê hate destekkirin ku li dijî modela demokratîk a Kurdan e. Her wiha destnîşan kir ku bi xwedîderketina li fîgurê Ahmet Şara re, ji jinedîtî hatina rabirdûya wî ya terorê re ew gihandin platformên Neteweyên Yekbûyî û Dewletên Yekbûyî yên Emerîkayê.
‘YEKANE STRATEJIYA TIRKIYEYÊ TASFIYEKIRINA DESTKETIYÊN KURDAN E’
Karamûs bi taybetî işaret bi rola Tirkiyeyê kir û ragihand ku nêzîkatiya erênî ya raya giştî ıya navneteweyî ya ji bo QSD’ê ji aliyê Tirkiyeyê ve weke gefeke mezin li ser ewlehiya xwe tê dîtin. Karamûs diyar kir ku ev tirs sedema bingehîn a destpêkirina vê pêvajoya nû ya bi komên radîkal e û got, “Tirkiye destketî û statuya Kurdan ji bo ewlekariya xwe weke gefeke mezin dibîne û ji ber vê yekê jî gelekî hewl dide ku komên radîkal xurt bike. Stratejiya xwe bi temamî ev e.”
Karamûs anî ziman ku Tirkiye dixwaze rewşa nû ya li Sûriyeyê veguherîne rewşeke li dijî Kurdan û destketiyên civakî, leşkerî û siyasî yên Kurdan tasfiye bike.
‘YEKÎTIYA NETEWEYÎ WEZÎFEYEKE WELÊ YE KU NABE BÊ TALOQKIRIN’
Hevserokê KNK’ê diyar kir ku stratejiya ‘rêya sêyemîn’ a Kurdan di konjonktura nû de bi rîskên cidî re rû bi rû ne û got, kêmasiyeke mezin e ku tevgerên Kurd li tevahiya erdnîgariya Kurdistanê siyaseteke hevpar neafirandine.
Karamûs bi bîr xist ku Qatar, Tirkiye û Erebistana Siûdî ji bo destketiyên Kurdan lawaz bikin li Dewletên Yekbûyî yên Emerîkayê di nava lêgerînên çalak ên dîplomatîk de ne û got, “Koalîsyona navneteweyî bi tena serê xwe garantiyek nîne. Divê haya mirovan ji vê hewldanê hebe û bi hişyarî tevbigere.”
Karamûs diyar kir ku pêvajoya bi banga 27’ê Sibatê ya Rêber Apo re destpê kir ji bo hevdîtinên dîplomatîk û tifaqa hevpar a nava Kurdan moral û motîvasyoneke mezin afirand û got, “Siyaseta Kurd ji bo derfetên li siyaseta herêmê û cîhanê derketine holê bi kar bînin, hîn siyaseteke hevpar neafirandine. Li gel vê yekê hevdîtinên dema dawî hatin kirin nîşaneya hewldaneke girîng e. Bi taybetî hevdîtinên navbera Rojava û Başûr ji bo Kurdan cihê hêviyê ye. Lê belê ev hevdîtin têrê nakin; pêwîstî bi stratejiyeke zelal û hevpar heye.”
Ahmet Karamûs destnîşan kir ku Kurd neçar in li hemû parçeyan stratejiyeke hevpar û îradeya tevgerke bi hev re nîşan bidin û got, “Heta niha ev yek bi temamî pêk nehatiye. Lê belê mîsyona hevpa a siyaseta tevahiya Kurdan divê ev be.”
Karamûs anî ziman ku siyaseta Kurd divê bi lez berjewendiyên partiyan dînin aliyekî û stratejiyeke hevpar ava bike û got, “Li Rojava jî rewş cuda nîne. Siyaseta Kurd di vê dema dîrokî de nikare dîmenekî parçebûyî nîşan bide.”
Hevserokê KNK’ê Ahmet Karamûs got, “Dema ku mirov rîsk û firsendan bi hev re binirxîne, sekna parçebûyî ya siyaseta Kurd ji bo gelê me lawaziyeke mezin e. Destketiyên ku li Rojava, li Başûr û li parçeyên din bi dest ketine, îro bi rîskeke cidî re rû bi rû ne. Divê haya mirovan ji vê hebe û li gorî vê jî yekîtiyê pêk bîne. Ev yekîtî ji bo me hemûyan wezîfe ye ku nabe bê taloqkirin.”
