Kongreya Azadiya Îranê daxuyaniyek weşand û piştgirî da banga greva giştî li Rojhilatê Kurdistanê.
Di çaremîn salvegera qetilkirina Jîn Emînî û tevgera ‘Jin, Jiyan, Azadî’ de, Kongreya Azadiya Îranê piştgiriya xwe ji bo banga Hevpeymaniya Hêzên Siyasî ya Kurdistanê ji bo greva giştî li bajarên Kurdistanê di roja Çarşemê, 16’yê Îlonê de diyar dike. Her wisa piştgiriya xurt a Kongreyê hevgirtina tevgerên cûr bi cûr yên Kongreyê bi gelê Kurd re nîşan dide û rola partiyên Kurdî di têkoşîna hevbeş a ji bo azadiyê de tekez dike.
Her wiha di daxuyanî de wiha hate gotin; “Jîna, wekî ku li ser kevirê gora wê hatiye nivîsandin, ew nemir û navê wê bû sembol. Di merasîma cenazeyê wê de li goristana Ayçî ya li Seqizê dirûşmeya “Jin, Jiyan, Azadî” deng veda û bû dirûşmeya sereke ya serhildaneke seranserî li dijî cudakarî û zordariyê. Ezmûna grevên berê nîşan daye ku bangên partiyên Kurdî, ku xwe dispêrin bingeha xwe ya gelêrî, ji aliyê girseyên bajarên cuda yên Kurdistanê ve hatine pêşwazîkirin. Ev şêwaza nerazîbûnê di serhildana “Jin, Jiyan, Azadî” de li bajarên din yên Îranê jî hate dubarekirin. Kongreya Azadiya Îranê greva giştî wekî gaveke sivîl û bi bandor ji bo îfadekirina daxwazên gel û berxwedana li dijî tepeserkirinê dibîne.”
Di dewamê de hate gotin ku ji tepeserkirina serhildana “Jin, Jiyan, Azadî” û yên beriya wê bigire heta komkujiya bêhempa ya gel di serhildana Çileya 2026’an de, Komara Îslamî ji bo parastina desthilatdariya xwe serî li sûc daye. Di dewamê de wiha hate gotin; “Bîranîna şehîdan, berdewamiya rêya wan û daxwaza edaletê ji bo wan ji têkoşîna me nayên veqetandin. Bidestxistina armancên ‘Jin, Jiyan, Azadî’ pêwîstî bi bidawî anîna Komara Îslamî û bi destxistina sîstemeke demokratîk a çandî ya pir-parastî li ser bingeha mafên mirovan, wekhevî û dijî-cudakariyê heye.”
Her wisa di daxuyaniyê de hate gotin ku Kongreya Azadiya Îranê piştgiriyê dide înîsiyatîfa hêzên siyasî yên Kurdistanê û banga wan a ji bo greveke giştî li Kurdistanê, di çarçoveya têkoşînên sivîl ji bo azadî û edaletê de û wê wekî derfetek dibîne da ku nirxa pêşverû ya tevgerê tekez bike.
Di dawiya daxuyaniyê de wiha hate gotin; “Kongre dê li gorî şert û mercên herêmî û şiyanên wan û bi awayê ku ew guncaw dibînin, piştgiriyê bide welatiyan û hêzên sivîl û siyasî yên herêmên din ên Îranê. Em weke Kongreya Azadiya Îranê Şehîd Jîna Emîn û hemû şehîdên şoreşê bibîr tînin û armancên şoreşa ‘Jin, Jiyan, Azadî’ tekez dikin.”
