Bi pêşengiya Platforma Saziyên Demokratîk bi şîara ‘Ji bo civaka demokratîk em bi kedê ber bi azadiyê ve dimeşin’ çalaki hate lidarxistin. Hevseroka Giştî ya DBP’ê Çîgdem Kiliçgun Ûçar, nûnerên partiyên siyasî û civaka sivîl û gelek kedkar beşdarî çalakiyê bûn.
Di tevahiya meş û mîtîngê de dirûşmeyên “Kar, aştî, ked”, “Em ê bi berxwedanê bi ser bikevin” û “Jin, jiyan, azadî” hatin berzkirin. Li qadê pankartên bi daxwaza ked, azadî û mafên civakî hatin hildan. Kedkarên çapemeniyê jî bi dirûşmeya “Çapemeniya azad nayê bêdengkirin” di kortejê de cih girtin.
Di axaftinan de hate diyarkirin ku têkoşîna kedê û daxwaza demokrasiyê ji hevdû qut nîne û behsa banga Rêber Apo ya “Aştî û Civaka Demokratîk” hate kirin. Li ser navê Komîteya Amadekar Anahtar Kaya axivî û diyar kir ku bi aştiyê re çavkanî wê ne ji bo şer, ji bo civakê bên veqetandin.
Karkera Şaredariya Yenîşehîr Muzeyyen Sevîm jî ev tişt got, “Yekîtiya karkeran hêza me ye, azadiya gel e. Em ji bo jiyanek nû amade ne. Em ji bo aştiyeke bi rûmet amade ne. Em ê dîrokê bi kedê binivîsin.”
Endamê Konseya Rêveber a Navendî ya KESK’ê Erdal Karakuş jî anî ziman ku divê desthilatdarî di pêvajoya aştiyê de gavên şênber bavêje.
Bername bi axaftina Hevseroka Giştî ya DBP’ê Çîgdem Kiliçgun Ûçar dewam kir.
Çîgdem Kiliçgun Ûçar nerazîbûn nîşan da ku polîsan mudaxileyî strana di dema rêzgirtinê de kir.
Çîgdem Kiliçgun Ûçar diyar kir ku li Tirkiyeyê aborî nîne, eger hebe jî navê wê “aboriya hilweşînê ye û got, tişta ku ev welat heq dike, aboriya civakî ye.
