Li Ewropayê gef û îxbarên bombeyan yên li ser şîrketên hewayî dewam dikin. Roja Pêncşemê herî kêm li ser 12 seferên balafiran îxbar hatin kirin. Hin seferên balafiran bi hevkariya balafirên şer pêk hatine, du balafir jî ber bi balafirgehên din ve hatin şandin. Balafireke ku ji Îrlandayê rabû, li baregeha leşkerî ya Évreux a li Fransayê hat danîn. 151 kesên li nav balafirê bi ewlehî hatin valakirin.
Îxbaran bi taybetî şîrketên hewayî yên erzan û seferên ber bi Bulgaristan, Çekya û Îtalyayê ve hedef girtin. Di destpêka hefteyê de jî li ser gelek seferan îxbar hatibûn kirin, lê di encamê de ti teqemenî nehatibûn dîtin. Karbidestên Bulgaristanê, diyar kirin ku hin îxbar bi rêya nameyên elektronîkî hatine şandin.
Îxbarên bombeyê bandor li ser rêwîtiya deryayî jî kir. Li Girava Syros a Yûnanistanê, keştiya seferê ya bi navê Crown Iris li ser îxbarê ji bo tedbîrê hat valakirin. Di lêkolînên ewil ên li ser keştiyê de ti teqemenî nehat dîtin.
Hîn nayê zanîn ku li pişt van îxbaran kî heye. Ev bûyer di demekê de diqewimin ku welatên Ewropayê, Rûsya û Îranê bi çalakiyên sabotajê tawanbar dikin. Moskow û Tehran van tawanbariyan red dikin.
