Di şeva 20’ê Hezîrana 2024’an de li gundê Tobînê yê navçeya Xana Axpar a Amedê şewat derket û demekî kin piştre li gundê Helberê yê navçeyê û gundên Kelekê û Dirînê yên navçeya Şemrex a Mêrdînê belav bûn. Di şewatê de 15 welatiyan jiyana xwe ji dest dan. Ji bo her 15 welatiyan li gundê Kelekê ku 10 kesan li wir jiyana xwe ji dest dabûn, merasîma bîranînê hat lidarxistin. Ji saetên serê sibehê ve ji gundên derdorê gelek wlatî hatin Kelekê û li mala şînê civiyan. Jin û zarokan jî wêneyên xizmên xwe hilgirtin û çûn ser gorên xizmên xwe.
Welatiyên hatin goristanê, gul danîn ser gorên xizmên xwe. Di bîranînê de welatiyan bertek nîşan dan û gotin ku dereng mudaxile hate kirin lewma karesateke wiha mezin çêbû. Rêxistinên DEM Partî û DBP’ê yên bajar û navçeyan, wekîlên DEM Partiyê Kamûran Tanhan û Bêrîtan Guneş, hevşaredarên Şemrexê û Bajarê Mezin a Amedê jî hatin gund. Girse, piştre ji cihê şînê derbasî goristanê bû.
Di merasîma bîranînê ya li goristanê de rêz hate girtin û piştre jî beşdaran gul danîn ser goran.
Abdulrezak Demîr ku di şewatê de bi giranî birîndar bûbû, daxwaza edaletê kir û got: “Bi ser re salek derbas bû lê hêj sedema şewatê nehatiye tespîtkirin. Derfetên dewletê hene û divê faîlan bibîne. Em dizanin ku şewat ji ber têlên ceyranê yên DEDAŞ’ê derket lê doz nehate vekirin. Em dixwazin kesên bûne sedema şewatê bên darizandin.”
Wekîla DEM Partiyê Bêrîtan Guneş Altin jî destnîşan kir ku ji roja şewat derketî heta niha gundî daxwaza edaletê dikin û heke di kêliyên ewil di ji hewayî mudaxile bihata kirin dê ev karesat pêk nehata. Bêrîtan Guneş Altin got ku hêj niha jî li cihê şewatê tevdîrên pêwîst nehatine girtin. Bêrîtan Guneş Altin kesên jiyana xwe ji dest dane bi bîr anî û got dê xwestî li daxwazên malbatên wan derkevin.
Piştî merasîma bîranînê, girse derbasî mala şînê bû û li vir mewlûd hate dayin.
