Hêzên Hewayî yên Ûkraynayê, ragihandin ku Rûsyayê di tevahiya şevê de bi 70 fuzeyan û 611 droneyan (ÎHA) êrîşê welêt kiriye. Hat gotin ku di encama pergala parastina hewayî de gelek êrîş têk çûne. Di serî de Kiev gelek bajar hatine hedef girtin. Hat ragihandin ku li Kievê di encama êrîşan de 5 kes mirin û 35 kes birîndar bûn. Li seranserê welêt hejmara miriyan gihîşt herî kêm 11 kesan.
AVAHIYÊN ÇANDÎ Û DÎROKÎ ZARAR DÎTİN
Di êrîşan de Katedrala Dormitionê ya ku di Lîsteya Mîrata Cîhanî ya UNESCO’yê de cih digire zirarek mezin dît. Her wiha Stûdyoya Fîlman a Dovjenko ya li Kievê, Muzexaneya Hunerên Bedew a Harkivê û Mala Muzîkê ya Dnipro jî zarar dîtin.
Serokdewletê Ûkranyayê Volodimir Zelenskî, îdia kir ku Rûsya hewirdora katedralê bi zanebûn hedef girtiye.
MOSKOVA ÎDÎAYAN RED KIR
Wezareta Parastinê ya Rûsyayê, jî îdîa kir ku êrîş tenê li dijî hedefên leşkerî hatine kirin. Moskovayê, îdia kir ku zirara li katedralê ne ji ber êrîşa Rûsyayê, ji ber sîstemên parastina hewayî yên Ûkraynayê çêbûye.
Li aliyê din jî, rayedarên Rûsyayê ragihandin ku di êrîşa ÎHA’yên Ûkraynayê de li herêma Tula herî kêm 3 kes hatine kuştin.
HEWLDANÊN DÎPLOMATÎK XITIMÎNE
Şerê ku zêdetirî çar salan e berdewam dike, hîn jî li qada şer guherînek berbiçav çênebûye. Her wiha di hewldanên dîplomatîk de jî pêşketineke berbiçav nehatiye bidestxistin. Şêwirmendê Kremlinê Yuri Ushakov, ragihand ku nûnerên DYE dê di demeke nêz de dîsa serdana Rûsyayê bikin. Zelenskî jî bang kir ku pêvajoya danûstandinan were lezandin.
