Federasyona Elewiyan a Demokratîk (FEDA), Yekîtiya Jinên Elewî ya Demokratîk (DAKB), Federasyona Komeleyên Demokratîk a Mereşê (MARDEF) û Kongreya Avakirinê ya Dersimê (DÎK) bi wesîleya salvegera 89’an a bûyerên Dersimê daxuyaniyeke hevpar dan.
Di daxuyaniyê de Komkujiya Dersimê weke “qirkirinê” hate pênasekirin û kesên jiyana xwe ji dest dan hatin bîranîn. Saziyan diyar kirin ku bûyerên qewimîn ne tenê meseleyeke dîrokî ye, di vê serdemê de jî bi şêweyên cuda dewam dike.
Di daxuyaniyê de rexneyeke tund li wê civînê hate kirin ku di bin sîwana dewletê de ji aliyê Serokatiya Cemxane ya Elewî Bektaşî ve hate lidarxistin. Hate ragihandin ku çalakiya bi navê “Civîna Şêwirmendiyê ya Rûspiyên Baweriyê yên li Erkana Rêya Elewî-Bektaşî” li Dersimê di 4’ê Gulanê de hate lidarxistin “provokasyon” e.
Hate ragihandin ku civîna navborî parçeyek ji polîtîkayên asîmîlekirinê ya li hemberî civaka Elewî ye û hate gotin, “Armanca karên bi vî rengî guhertina nasname û baweriyê ye.” Saziyan civîn weke “hewldaneke ne masûm” pênase kirin.
Di daxuyaniyê de hate destnîşankirin ku Dersim ji bo baweriya Elewiyan navendek e û hate ragihandin ku gavên bi vî rengî zerarê didin pêvajoyên aştî û demokratîk. Di daxuyaniyê de ji bo rûbirûbûna rabirdûyê bang hate kirin û hate xwestin, ku cihê gorên Seyît Riza û hevalên wî bê eşkerekirin û daxwazên mexdûran bi cih bêne anîn.
PÎR ÊN TEVLÎ BÛN ‘DIJMINÊ BAWERIYÊ’ NE
Di daxuyaniyê de hate gotin, “Em vê êrişa Serokatiya Cemxaneyê ya Elewî-Bektaşî bi tundî şermezar dikin. Her wiha wan qaşo pîrên ku tevlî bûn jî weke dijminê baweriyê îlan dikin. Em di wê baweriyê de ne ku civaka Elewî-Bektaşî wê di vê mijarê de hişyar be. Bila her kes zanibe, civaka Elewî-Bektaşî çawa ku êrişên heta niha têk bir, wê vê êrişê jî berevajî bike û teslîmî dijminê Elewî-Bektaşî nebe.”
Saziyan di dawiya daxuyaniyê de bang li civaka Elewî kirin ku hişyar be û gotin, ew polîtîkayên navborî şermezar dikin û wê têkoşîna xwe dewam bikin.
