Serokwekîlê Koma DEM Partiyê Sezaî Temellî li Meclîsê civîneke çapemeniyê lidar xist û bûyerên siyasî û aborî yên rojane nirxand.
Temellî da zanîn ku wan hefteya bihûrî têkildarî cînayetên jinan, tenduristiya jinan û îstîhdamkirina jinan 3 pêşnûme pêşkeşî Meclisê kirine lê bi dengên AKP û MHP’ê hatine redkirin. Temellî, anî ziman ku tevî bîlançoya giran jî Meclis bi înad naxwaze li ser vê mijarê biaxive.
Di berdewamê de Temellî bal kişand ser deklarasyona Newrozê û diyar kir ku Newroz dê li 53 navendan bê pîrozkirin, Newroz roja tacîdarbûna têkoşîna wan e û îsal jî dê bi daxwaza demokrasî û azadiyê li qadan bin. Temellî, banga tevlibûna Newrozê li her kesî kir.
Di berdewama axaftina xwe de Temellî işaret bi şerê li herêm ê kir û got ku ew her ji bo aştî û aramiya herêmê têkoşiyane. Temellî, bal kişand ser şerê li Îranê û got ku li rexekî rejîma otorîter a Îranê ku zilmê li Kurdan û gelên din dike heye û li rexa din jî hêzên emperyal hene. Temellî, diyar kir ku di vî şerî de tenê gel winda dikin û wiha pê de çû: “Lê em vê baş dizanin ku heta ku welat demokratîk û hiqûqî nebin dê her tim bibin qadên şer. Divê ev şer tavilê bi dawî bibe, li Îranê rejîmeke demokratîk ava bibe.”
Temellî di dirêjiya axaftina xwe de Qanûna Parkên Neteweyî ku niha li Meclisê tê nîqaşkirin nirxand û got ku ev deverên divê werin parastin, pêşkeşî bazirganiyê tên kirin. Têkildarî komeqanûna di Komîsyona Plan Budçeyê jî Temellî got ku sermayedar tê de cih digirin lê xizan, karker, kedkar û teqawid tê de cih nagirin. Temellî, got: “Tu tiştekî diviyabû tê de cih bigirta, tê de cih negirtiye.”
Bi domdarî Temellî daxuyand ku hewceye di Qanûna Înfazê de verasetkirinek çêbibe û wiha dirêjî da axaftina xwe: “Siyasî yan jî edlî niha gelek girtî li bendê ne ku qanûneke înfazê ya wekhev ku tê de cihêkarî nîne bikeve meriyetê. Li hêla din behsa Paketa Darazê ya 12’an tê kirin. Girîng e ku ji hêvî û bendewariyên gel re bibe bersiv. Mixabin di daxuyaniyên heta niha me de tiştekî wiha nedîtiye. Me tê de çi dît? Cezakirina zarokan. Gel li bendê ye ku qanûna taybet tavilê bê Meclisê.”
Temellî di dirêjiya axaftina xwe de îşaret bi krîza aborî kir û got ku îktîdar di mijara enflasyonê de têk çûye, enflasyon zêde dibe, heke şerê heyî bidome dê enflasyon zêdetir bibe û axaftina xwe wiha qedand: “Baş e lê çima bernameya wan a aboriyê têk çû? Ji ber ku ji cihên pêwîst bacan nastînin lewma. Barê heyî li xizan, kedkaran bar dikin û êdî li ser sifreya gel tu tiştek nehiştin.”
