Çalakiya Nobetên ya li Wargeha Penaberan a Şehîd Rustem Cûdî (Mexmûr) di 20’ Tîrmeha 2023’an de ji bo azadiya fîzîkî ya Rêber Apo hatibû destpêkirin, bi koma 204’an û di roja 1060’an de didome.
Dewrgirtina çalakiyê li Saziya Malbatên Şehîdên a Mexmûrê bi amadebûna gel bi deqeyek rêzgirtinê ji bo giyanê tevahî Şehîdên Azadiya Kurdistanê destpê kir. Piştî rêzgirtinê li ser navê koma 203’an Qeder Kar daxuyaniyek da.
Daxuyanî wiha ye:
“Têkoşîna ku îro em ji bo azadiya fîzîkî ya Rêber Apo dimeşînin, di vê pêvajoyê de gihiştiye astekî cûda. Ji ber ku meşa Rêber Apo yaku ji roja destpêka têkoşînê heta niha dom kiriye, îro bûye meşa bi milyonan. Ango mirov dikare bêje êdî bûye meşa rûmeta mirovahiyê. Ji ber wêyekê ye ku îro li seranserê cîhanê ji bo azadiya fîzîkî ya Rêber Apo çalakî tên lidarxistin.
Ji bo vê, wek gelê Kurd û dostên Kurdan, pêwîste ku têkoşîna me ya esasî belavkirina fikir û felsefeya Rêbertî be. Beriya 27 salan, ango ji roja ku ev têkoşîn destpê kiriye heta niha, fikir û felsefeya Rêbertî bûye tirsa desthilatdaran. Jixwe yek ji sedemên dîlgirtina Rêbertî ev bû. Ji ber wê yekê, belavkirin û fêmkirina fikrên Rêbertî wê me hîn zêdetir nêzî azadiya fîzîkî ya Rêbertî bike. Bi taybetî, belavkirina manîfestoya ‘Aştî û Civaka Demokratîk’ a Rêbertî wê azadiya mirovahiyê jî bi xwe re bîne.
Ji bo wê pêwîste em bi hemû hêza xwe, wek rûbarên diherikin qet nerawestin; meş û têkoşîna xwe ya ji bo azadiya fîzîkî ya Rêbertî hîn mezintir bikin. Ji ber ku em dizanin, dema di tariyê de çirûskek hat pêxistin, êdî vemirandina wê ne gengaze.
Emê jî vê meşa pîroz heta lûtkeya serkeftinê bimeşînin. Rêya me rêya rûmetê ye û emê heta dawiyê li ser vê rêyê bin. Ji roja ku me dest bi çalakiyên xwe kiriye heta îro, peyva li ser zimanê me yeke; heta ku azadiya fîzîkî ya Rêber Apo mîsoger nebe, em dev ji têkoşîn û çalakiyên xwe bernadin! Emê her qadê bikin qada berxwedanê û agirê têkoşîna xwe hîn bêtirgeş bikin.”
Merasîma dewrgirtinê bi dirûşmeyên ‘Bê Serok Jiyan Nabe’ û ‘Bijî Serok Apo’ dewrî koma din hate kirin.
