Li dijî êrişên qirker ên dewleta Tirk ên li ser gelê Kurd, bi pêşengiya fermandarê mezin ê PKK’ê Egîd (Mahsûm Korkmaz) di 15’ê Tebaxa 1984’an de têkoşîna çekdarî destpê kir. Gerîlayên HPG û YJA Starê bi wesîleya salvegera 42’an a Pêngava 15’ê Tebaxê ji ANF’ê re axivîn.
Gerîlayê HPG’ê Dilovan Amed bi pîrozkirina pêngava 15’ê Tebaxê dest bi axaftina xwe kir û got, “Piştî pêngava 15’ê Tebaxê me xwe nas kir, dîroka xwe nas kir. Ev roj roja jinûve vejîna gelê Kurd e. Pêngava 15’ê Tebaxê kir ku gelê Kurd ji xewna mirinê hişyar be û gavên nû biavêje. Fîşeka destpêkê weke fîşeka azadiyê hate pênasekirin. Ev yek rastiya gelê Kurd e. Gelê Kurd bi saya vê pêngavê bû xwedî hêz, îrade û artêşê. Wê demê hinekan digotin, ‘Zêde wê dewam neke, di nava çend rojan de wê biqede’. Lê belê berxwedana gelê me û tevgera me roj bi roj mezin bû. Gelê me roj bi roj zane bû, ciwanên me bûn şoreşger û pêşeng. Vê pêngavê li herêmê gelek tişt bi xwe re anî. Şoreşa mejî, şoreşa jinê, Şoreşa Rojava bi xwe re anî. Êdî her kes gelê Kurd nas dike. 15’ê Tebaxê ruh da her kesî. Rastiya dijmin raxist pêş çavan û rêya têkoşînê nîşan da.”
Gerîla Elefterya Cizîr di şexsê fermandar Egîd de şehîdên Kurdistanê hemû bi bîr anî û li ser wate û girîngiya 15’ê Tebaxê ev nirxandin kir: “Fîşeka destpêkê ya ku hevalê Egîd teqand fîşeka azadiyê bû û ev pêngav îro bi azadiya gelê Kurd digihêje encamê. 15’ê Tebaxê li dijî qirkirinê pêngava jinûve vejînê bû. Pêngava rabûnê û biryara berxwedanê bû. Îro di şexsê hevrê Egîd de bi milyonan mirov ber bi azadiyê ve dimeşin. Ev pêngav her roj hîn bi wate dibe. Guhertinên ku vê pêngavê pêk anî îro di siyaseta Rojhilata Navîn de roleke girîng dilîze. Em çiqasî qala 15’ê Tebaxê bikin kêm e. Lê belê ya girîng ew e ku nirxên 15’ê Tebaxê her tim bêne parastin û fêhmkirin.”
‘PÊNGAVA 15’Ê TEBAXÊ GUHERÎNÊN DÎROKÎ PÊK ANÎ’
Gerîla Çiya Zagros jî bal kişand ser sedemên destpêkirina Pêngava 15’ê Tebaxê û bandora vê yekê li ser Tevgera Kurd. Çiya Zagros diyar kir ku gelê Kurd 15’ê Tebaxê weke cejna vejînê pîroz dike û got, “Bêguman destpêkirina 15’ê Tebaxê bêbingeh nîne. Di destpêka vê têkoşînê de armanc Kurdistaneke azad û siyaseteke demokratîk bû. Dewleta Tirk li dijî gelê Kurd siyaseta înkar û îmhayê dimeşand. Ji ber vê yekê jî darbeya 12’ê Îlonê pêk hat. Di dema vê darbeyê de gelek kadroyên pêşeng ên PKK’ê hatin girtin. Dewleta Tirk di şexsê van hevalan de dixwest ku Tevgera Apoyî teslîm bigire. Li hemberî hevalên li zindanê dîl hate girtin êşkenceyên giran hate kirin. Lê belê berxwedêrên zindanan li hemberî êşkence, komkujî û şerê taybet li ber xwe dan û bi lehengî şehîd bûn.
Pêngava 15’ê Tebaxê jî weke bersiva li xwedîderketina bîranîna van hevalan weke bersiveke dîrokî destpê kir. Vê pêngavê guhertinên dîrokî bi xwe re anî. Tevgera Kurd mezin bû, artêş û partiya jinê ava bû, hebûna Kurdan hat naskirin. Ev yek guhertinên mezin û destketiyên dîrokî ne. Eger îro maseyek li holê hebe û qala demokrasî û azadiyê tê kirin, bêguman di vir de bandora 15’ê Tebaxê ji sedî sed heye. Dewleta Tirk biryara qirkirina Kurdan dabû, lê belê vê pêngavê destûr neda vê yekê. Li ser vê bingehê çi dibe bila bibe divê gelê me û dostên me 15’ê Tebaxê bi coş, kelecan û bi heybet pîroz bikin. Em careke din Cejna Vejînê ya 15’ê Tebaxê pîroz dikin. Em ê heta dawiyê li ser xeta 15’ê Tebaxê bimeşin û armanca şehîdan pêk bînin.”
