Ji bo fermandara gerîla Dîlan Şirnex ku 17’ê Îlona 2026’an li Başûrê Kurdistanê şehîd bû, ji aliyê Meclîsa Malbatên Şehîdan ve bi beşdariya endamên meclîsê û gel li Kobanê û Hesekê merasîm hatin lidarxistin.
Li Kobanê piştî deqeyekê rêzgirtin endama koordînasyona Kongira Star ya bajarê Kobanê Rûken Ehmed axivî, Rûken sersaxî ji malbata şehîd re xwestin û got: “ Dema mirov pênaseya heval Dîlan dike, di hemû waran de xwedî kesayeteke bi hêz û li her derê têkoşîneke bê hempa da meşandin.”
Rûken wiha dewam kir: “Ew ji bo hevalên xwe di nava şer de palpişt bû. Rêber Apo digot `Hêvî ji serkeftinê binirxtir e`, Dîlan jî bi wî rihî bi roj û şev li ber xwe dide. Dema em şehîd Dîlan bi taybet li Kobanê bi bîr tînin, em îsbat dikin ku em hemû li ser riya Dîlanan in.”
Endama RêveberMya Meclîsa Malbatên Şehîdan ya bajarê Kobanê Eyşe Efendî jî behsa bîranînê xwe û şehîd Dîlan di nava şerê kobanê de kir.
Çalakiya bîranînê bi durişmên “Şehîd Namirin” bi dawî bû.
Merasîma sersaxiyê li taxa Kelasê ya Hesekê bi beşdariya bi dehan şênî, endamên saziyên sivîl, rêxistinên jinan û partiyên siyasî hat lidarxistin.
Piştî deqeya rêzgirtinê bi navê Meclisa Malbatên Şehîdan a Hesekê Sîham Îsmaîl axivî û hemû şehîdên tevgera azadiyê bi bîr anîn, sersaxî ji malbata şehîd Dîlan Şirnex re xwest û wiha got: “Şehîd Dîlan di temenekî biçûk de tev li nava refên têkoşînê bû û rêya xwe bi israr berdewam kir.”
Endama Meclisa Malbatên Şehîdan Leyla Sarûxan jî axivî û wiha got: “Xewnên şehîdan emanetek in di stûyê me de. Em ê bi berpirsyarî li beramberî daxwazên şehîdan rawestin, heta pêkanîna daxwazên şehîdan û bidestxistina mafên xwe di destûra Sûriyeyê de, em ê tê bikoşin.”
Endama Koordînasyona Kongra Star Nahid Silêman jî destnîşan kir ku şehîd Dîlan 32 salan ji bo azadiyê tê koşiye, di gelek qadan de cih girt û wiha anî ziman: “Bi saya fikr û felsefeya Rêber Abdullah Ocalan, şehîd Dîlan bi israr daxwaza azadkirina jinan dikir.”
