Li gelek bajarên Egeyê pîrozbahiyên 1’ê Gulanê hatin lidarxistin. Li Îzmîrê deh hezaran kesên ku di mitînda 1’ê Gulanê de li Qada Gundogdu kom bûn, destnîşan kirin ku dê mafê kedkaran bigirin.
Ji aliyê Komîteya Amedekar a 1’ê Gulanê ya Îzmîrê ve li navçeya Konak a Îzmîrê li Qada Gundogdu mitînga 1’ê Gulanê hate lidarxistin. Girseya ku li Qada Basmane, li Qada Cumhuriyetê û li Bêndera Alasancakê kom bûn ji sê aliyan ve ber bi qadê meşiyan. Di meşê de pankartên “Em ji bo ked, edalet, wekhevî, aştî, azadî û demokrasiyê li qadan in”, “Keda jinan ne erzan e”, “Bijî 1’ê Gulanê, em li dijî JES’an in” hatin hilgirtin û dirûşmên “Bijî berxwedana karkeran”, “Cotkar û karker hemû proleter” hatin berzkirin.
Li gel sendîka û partiyên siyasî, komeleyên ekolojî, rêxistinên jin û civakî tevli mitîngê bûn. Piştî axaftina destpêkê li ser navê kedkarên Temel Conta yên ku ji bo mafên xwe yên sendîkal 508 roj in di grevê de ne, Sînem Kaya û kedkarên Dîgel Tesktîl ên di grevê de axivîn.
‘KES NE BI TENÊ YE’
Nûnerê DÎSK’ê yê Herêma Egeyê Denîz Gumuştekîn li ser navê Komîteya Amedekar axivî û diyar kir karker roj bi roj xizantir dibin û ev tişt got: “Jiyan ji her alî ve hatiye dorpêçkirin. Dewlemend bêtir dewlemend dibe û kedkar roj bi roj xizan dibin. Barê bacê li ser pişta xebatkaran e. Polîtîkayên welat kedkar ber bi xizaniyek kûr ve dibe. Jin hem di nava kar hem di jiyana civakî de bi tundiyê re rû bi rû ne. Kes ne bi tenê ye jiyanek bêtundî û wekhev heq e. Ji bo rantê jîngeh tên tunekirin. Berdêla wêraniya ekolojîk hemû gel dide. Cînayetên kar pêk tên. Pêşeroja vî welatî em ê ava bikin. Ji bo keda xwe, ji bo wekheviya dehate û ji bo aştiya cîhanê em bibin yek.” Mitîng piştî axaftinan bi konserê ve bi dawî bû.
Li bajarên Mugla, Manîsa, Denîzlî, Manîsa, Afyon, Balikesîr, Kutahya bi munasebeta 1’ê Gulanê pîrozbahî hatin lidarxistin.
