Meclisa Malbatên Şehîdan a Cizîrê bi boneya Cejna Zimanê Kurdî û tevlêbûna meşa girseyî ya parastina ziman daxuyaniyek da. Di daxuyaniya li Stadyuma Şehîdên 12ˊê Adarê ya Qamişloyê hat dayîn de endamên meclisê amade bûn.
Di çalakiyê de pankartên “Civaka xwe gihandibe ziman, bûye xwendiyê sedema bi hêz a jiyanê”, “Dûrxistina ziman ji qada giştî û ji perwerdehiyê parçeyek ji ˋkomkujiya çandîˊ ye”, “Bila Kurdî bibe xwedî statu!” hatin hildan.
Endama Rêveberiya Meclisa Jin a Meclisa Malbatên Şehîdan a Qamişloyê Ayide Xelîl bi zimanê Erebî û Endamê Meclisa Malbatên Şehîdan a Cizîrê Diyar Hesen bi zimanê Kurdî daxuyanî xwend.
Daxuyaniyê wiha ye:
“Em wekî Meclisa Malbatên Şehîdan, ji wê pîroziya ku bi xwîna keç û kurên me yên canê xwe fedayî azadî, rûmet û edaletê kirine hatiye avdan, tekez dikin ku têkoşîna me tu carî tenê ji bo manê nebûye; berovajî wê, ji bo bidestxistina mafên me yên hatine talankirin û parastina nasnameya me ya ku desthilatê bi dehsalan hewl dida tune bike, bûye.
Bi boneya Cejna Zimanê Kurdî (15 Gulan), em pîrozbahiyên xwe yên herî germ pêşkêşî tevahî gelê xwe dikin. Em destnîşan dikin ku ev roj ne tenê pîrozbahiyek asayî ye, lê belê sekineke bi rûmet e ku em tê de bi bîr tînin ku ziman rihê gelan, nasnameya hebûna wan û keleha dawî ya parastina nasnameyê ye. Îro, piştî derbasbûna 15 salan li ser destpêkirina Şoreşa Rojava, em dubare dikin ku yek ji armancên herî pîroz û girîng ên vê şoreşê, çespandina mafê perwerdeya bi zimanê dayikê bû wekî bingeha avakirina civakeke azad, û em ê tu carî ji vê armancê venegerin.
Li ser vê bingehê, em daxwaz û xalên xwe yên sereke ku nayên nîqaşkirin, ji raya giştî re radigihînin:
– Naskirina Destûrî: Em daxwaza naskirina zimanê kurdî di destûrê de wekî zimanekî fermî dikin. Sûriyeya pêşerojê li ser dûrxistina zimanên pêkhateyên din nayê avakirin. Fermîkirina zimanê kurdî vegerandina rûmeta dîrokê ye û gava yekem e ber bi peymaneke civakî ya rastîn ku wekheviyê garantî dike.
– Mafê Zimanê Dayikê: Perwerdeya zarokên me bi zimanê wan ê dayikê mafekî xwezayî û qanûnî ye ku me bi berdêlên giranbiha bi dest xistiye, û em ê di bin tu mercî de dest ji vî mafî bernedin. Perwerdeya bi zimanê dayikê yekane rê ye ji bo avakirina nifşên ku bi nasnameya xwe serbilind bin û li hember serdemê vekirî bin; ev berhema ku me bi xwîna şehîdan di nav 15 salên şoreşê de av daye.
– Pîroziya Navên Şehîdan: Me navên saziyên xwe yên zanistî û dibistanên xwe bi navên şehîdên xwe yên nemir kirine, da ku bîranîna wan ji bo nifşan bibe ronahî. Em bi eşkereyî radigihînin: Em rê nadin ku navên dibistanên me yên ku navên şehîdan hildigirin werin guhertin. Ev nav xeta me ya sor in û beşek ji bîra me ya pîroz in; her hewildanek ji bo destwerdana wan, kêrek e li rûmeta malbatên şehîdan dikeve.
Di encamê de; em wekî Meclisa Malbatên Şehîdan a Cizîrê, di dema ku em girîngiya jiyana hevbeş û yekîtiyê diparêzin, tekez dikin ku aştiya rastîn bi naskirina nasname û mafên pêkhateyan dest pê dike. Soza me ya ji bo şehîdan berdewam e û em ji mafên xwe tawîzan nadin.
Li ser vê bingehê, em bang li tevahî welatparêz û gelê xwe yê xwedî rûmet dikin ku tev li meşa mezin bibin a ku di dîroka 14.05.2026’an de bi rê ve diçe, meş ji Çerxerêya Qermotî saet 10:30 dest pê dike û heta Stadyom 12ˊê Adarê berdewam dike. Werin da ku em dengê xwe ji bo parastina ziman û nirxên xwe bilind bikin.”
Daxuyanî bi berzkirina dirûşmeyên “Şehîd namirin”, “Bijî zimanê Kurdî” û “Serkeftin ji bo îradeya gelên azad e” bi dawî bû.
