Nêzîkî 50 sînemavanên Kurd ku li Ewropayê dijîn, ji bo ku pirsgirêkên sînemaya Kurdî yên ji hilberînê heta belavkirinê, ji festîvalan heta perwerdeyê nîqaş bikin û rêyên çareseriyê yên hevpar pêş bixin, li bajarê Charleroi yê Belçîkayê di Komxebatê de hatin cem hev.
Di civîna ku dê sê rojan berdewam bike de derhêner, senarîst, hilberîner, lîstikvan, derhênerên wêneyan, edîtor û organîzatorên festîvalan beşdar dibin.
Di hevdîtina ku di 18’ê Îlonê de li Mala Çandê ya Çanda Medê dest pê kir de, sînemavanan pêşî xebat û ezmûnên xwe parve kirin. Piştre beşdar wek çar komên xebatê hatin diyarkirin.
Kom di bin sernavên belavkirin û festîval, hilberîn û fînans, perwerde û pêşxistin, û piştevaniya navneteweyî de hatin ava kirin.
Di Komxebatê de ne tenê tespîtkirina pirsgirêkên heyî, di heman demê de pêşxistina pêşniyar û rêyên çareseriyê yên berbiçav ji bo van pirsgirêkan tê armanc kirin.
Komên xebatê di 18’ê Îlonê de civînên xwe dan destpêkirin û tê plankirin ku di 19’ê Îlonê de nîqaş bêne kûrkirin. Tespît û pêşniyarên ku kom dê amade bikin di 20’ê Îlonê de dê ji bo hemû beşdaran bê pêşkêş kirin.
Di dawiya hevdîtinê de xurtkirina peywendiyên di navbera sînemavanên Kurd ên li Ewropayê de, zêdekirina derfetên hilberîna hevpar û piştevaniyê û pêşxistina çareseriyên hevpar ji bo pirsgirêkên ku sînemaya Kurdî di qadên cawaz de ji hilberînê heta belavkirinê dijî, tê armanc kirin.
