Çiyayên Kurdistanê li gel heybeta xwe bi çîrokên têkoşîn û jiyanê yên bêhejmar ên şahidî jê re kiriye, xwedî wateyeke xweser e. Çiyayên ku ji şahidî ji jiyan, êş, kêfxweşî û serketina gerîla re kirine, ji bo têkoşerên azadiyê ne tenê qadeke têkoşînê di heman demê de bûne warê keşifkirina xwe û hêza xwe.
Yek ji kesên bi lêgerîna azadiyê berê xwe dan çiyayên Kurdistanê gerîlaya YJA Starê ya ji gelê Ereb Zekiye Dêrazor e. Dêrazor ku li nava malbateke welatparêz mezin bû, bi bandora tecrûbeyên têkoşînê û şehîdên li nava malbata xwe lêgerîna xwe ya li azadiyê kûr kir.
Dêrazor ku destpêkê Yekîneyên Parastinê yên Jinê (YPJ) nas kir, ji sekin û îradeya jinan a li nava têkoşînê bi bandor bû. Dêrazor ku hêza jinan a guhertina jiyanê û jinûve avakirinê li nava refên YPJ’ê nas kir, demekê li Rojava di nava YPJ’ê de têkoşîn meşand.
Dêrazor ku bi tevlîbûna li nava refên YPJ’ê re fikrê neteweya demokratîk a Rêber Apo nas kir, piştre berê xwe da çiyayên Kurdistanê û biryar da ku beşdarî nava refên gerîla bibe.
Dêrazor nêrînên xwe yên têkildarî pirsgirêkên jinan bi van gotinan anî ziman:
“Em weke jinên ji gelê Ereb xwedî mafên siyasî û leşkerî nînin. Her tim weke makîneyeke zarokan tînin dinyayê têne dîtin û di nava çarçoveyeke teng de têne hiştin. Ez jî weke jineke Ereb a ku mafên wê jê hatine stendin ketim bin bandora tevgera YPJ’ê. YPJ ne tenê tevgereke leşkerî ye; di heman demê de tevgereke siyasî ye ku ji bo gel û jinan têdikoşe. YPJ bi bandora nêrînên Rêber Apo xwe ava kiriye. Bi taybetî bi nêzîkatiya ‘Jin azad nebe civak jî azad nabe, têdikoşe. Herî zêde vê têkoşînê bandor li min kir.”
‘BI BANDORA JI ZEKIYE ALKAN MIN NAVÊ WÊ LI XWE KIR’
Gerîlaya YJA Starê Dêrazor qala çîroka lixwekirina navê “Zekiye” kir û got, “Piştî ku tevlî nava YPJ’ê bûm, min jinên têkoşer ên weke Zekiye Alkan nas kir û xwest, navê wê li xwe bikim. Hevala Zekiye Alkan yek ji jinên têkoşer bû ku canê xwe ji bo welatê xwe feda kir. Ji bo azadiya gelê xwe bedena xwe da ber agir. Ji bo min xwedî wateyeke taybet bû. Weke wê min xwest hêjayî gelê xwe bim û ji bo parastina gelê xwe têbikoşim.”
Dêrazor diyar kir ku piştî navê xwe kir Zekiye, biryar da ku bi berpirsyariya vî navî rabe û got, “Ji bo karibim xwedî li navê xwe derkevim min biryar da ku tevlîbûna li nava refên gerîla rêya herî rast e. Lewma beşdarî nava hêzên YJA Starê bûm.”
Dêrazor ragihand ku dema destpêkê hat çiyayên Kurdistanê ji bilindahiyê ditirsiya û ev tirsa xwe bi hevrêyên xwe re parve kir û ji ser xwe avêt. Dêrazor got, “Dema ku hatim çiyayên azad ez destpêkê ji bilindahiyê ditirsiyam. Lê belê bi hevalên xwe re min ev tirs ji ser xwe avêt û wêrekiya xwe dît. Piştî ku hatim çiyayên Kurdistanê min dît ku hêza min têra her tiştî dike.”
‘DI NAVA JIYANA GERÎLA DE HERÎ ZÊDE HEVRÊTIYÊ BANDOR LI MIN KIR’
Dêrazor anî ziman ku di nava jiyana gerîla de herî zêde têkiliyên hevrêtiyê bandor li wê kir û got, “Alîkariya bi hev re û piştevaniya jinan a ji hev re gelekî bandor li min kir. Ev jî bû sedem ku hîn bêhtir ji jiyanê hez bikim û ji bo armancên mezin bijîm.”
Dêrazor axaftina xwe bi vî rengî dewam kir:
“Min fikrê Rêber Apo nas kir. Bi taybetî gelekî bandor li min kir ku nirxandinên xwe yên têkildarî jinan ne di çarçoveya neteweyeke bi tenê de ye. Nêrînên Rêber Apo ew hêz da min ku ji tiştekî netirse û wêrek be. Ji ber ku di nav asîstemê de min ev hêz bi xwe re nedidît; hîs nedikir ku xwedî mafê jiyaneke bi hêsanî me. Lê belê dema ku min fikrê Rêber Apo nas kir, min hêza xwe dît.”
Dêrazor diyar kir ku her kes zane bê Rêber Apo çi nirx ji jinan re afirandiye û got, “Lîderê ti tevgerê ev yek nekiriye. Ji ber vê jî em jin minetdarê Rêber Apo ne ku ji bo me jinan jiyaneke azad ava kiriye.”
