Serokatiya Rûhanî ya Civaka Misilmanên Durzî bi daxuyaniyekê banga parastina civaka Durzî kir. Her wiha bang li civata navneteweyî kir ku berpirsyariyên xwe yên mirovî û exlaqî bi cih bîne.
Di daxuyaniyê de hat gotin: “Em bang li cîhana azad û hemû hêzên wê yên bibandor dikin. Em banga xwe digihînin serok Donald Trump, serokwezîr Benjamin Netanyahu, prens Muhammed Bîn Selman, qral Abdullah El Sanî û her kesê ku di vê dinyayê de deng û bandor heye… Siwêdayê rizgar bikin.”
Di daxuyaniyê de her wiha hat gotin: “Gelê me bi xwînsarî tê tunekirin û kuştin, bêyî cudahî di navbera ciwan û pîr, jin, bijîşk an şêxan de. Cihên îbadetê û dêr têne hilweşandin, komkujî li ber çavê cîhanê tê kirin.”
Serokatiya Civaka Durzî di berdewama daxuyaniya xwe de diyar kir “Komika desthilatdar li Şamê êdî ne rewa ye û ji bilî çekan û agir tiştekî ji desthilatdariyê nizane” û bang li civata mezheba Sunnî kir ku der barê van tiştên dibin de helwesteke zelal bigire, her wiha tekez kir ku têkiliyên di navbera Sûriyeyiyan de divê li ser bingeha xwişk û biratiyê bin, ne dijminatiyê.
Serokatiya Rûhanî ya Civaka Misilmanên Durzî di dawiyê de da zanîn ku ev bang “ne siyasî ye, lê mirovî û exlaqî ye” û hate gotin: “Gelê ku tenê ji ber jiyan û rûmet xwestiye tê kuştin, rizgar bikin.”
