Di çarçoveya 8’ê Adarê Roja Jinên Kedkar ên Cîhanê de, li bajarê Sheffield ê Înglandê ji aliyê Komuna Jinan a Jina Emînî ve şahiyek hat lidarxistin. Jinên Kurdistanî eleqeyeke mezin nîşanî şahiyê dan; şahî bi deqeyek rêzgirtinê ji bo bîranîna kesên di têkoşîna azadiya jinê de jiyana xwe ji dest dane dest pê kir. Di çalakiya ku bi şîara “Niha dema jinê ye” hat lidarxistin de, sînevîzyonek li ser têkoşîna jinên Kurd hat nîşandan.
Di çalakiya ku jinên Kurdistanî bi kincên xwe yên herêmî beşdar bûn de, posterên Jina Emînî, Sakine Cansiz, gerîlayên jin ên şehîd û Rêber Apo li salonê hatin daliqandin. Di çalakiyê de ku her car dirûşma “Jin jiyan azadî” dihat berzkirin, peyama 8’ê Adarê ya Rêber Apo hat xwendin.
Di çalakiyê de bi Kurdî, Îngilîzî û Tirkî axaftin hatin kirin. Di axaftinan de hat destnîşankirin ku di wêjeya akademîk de tevgera jinên Kurd wekî “têkoşîneke dualî” tê pênasekirin.
Hat destnîşankirin ku ji bo jinên Kurd 8’ê Adarê tenê ne rojek bîranînê ye, ew kêliyek e ku ezmûnên dîrokî, windahî û daxwazên mafan ên berdewam di bîra kolektîf de ji nû ve tên hilberandin.
Hat diyarkirin ku paradîgmaya zayendîparêz a Rêber Apo, ji bo tevgera jinên Kurd û têkoşîna azadiya jinên Rojhilata Navîn wekî rêberek e.
Axivêran bal kişandin ser wê yekê ku jinên Kurd ne tenê di têkoşîna wekheviya zayendî de, lê di heman demê de di têkoşînên berfireh ên ji bo ewlehî û saxbûna kolektîf de jî cih digirin; wan diyar kir ku ew ê pêngava “Niha Dema Jinê Ye” ya ku TJA’yê daye destpêkirin, veguherînin pêngaveke azadiyê.
Piştî axaftinan, jinên Kurdistanî govend girtin û 8’ê Adarê bi coş pîroz kirin.
