Civaka Êzidî li seranserî Kurdistanê, Iraqê û li dîasporayê bi rojan e li qadan e, dengê xwe yê mafdar bilind dike û daxwaza edaletê dike. Meclisa Gel a Şengalê li ser çalakiyan û geşedanên siyasî yên dawî daxuyaniyek nivîskî weşand.
Daxuyaniya Meclîsa Gel a Şengalê bi vî rengî ye:
“Civaka me ya Êzidî li seranserî Kurdistanê, Iraqê û li dîasporayê bi rojan e li qadan e, dengê xwe yê mafdar bilind dike, daxwaza edaletê dike û feraseta ku Jenosîda Şengalê aniye serê gelê me bi tundî şermezar dike. Li gel ku 12 sal di ser karesat û Fermana sala 2014’an re derbas bûne jî, mixabin heta roja îro dosyayên girêdayî Şengalê hatine îhmalkirin, tu gavên berçav ji bo cezakirina tawanbaran û pêkanîna edaleta veguhêz nehatine avêtin. Di serî de Hukûmeta Navendî ya Iraqê û piştre jî Hikûmeta Herêma Kurdistanê bi xemsariyeke mezin, polîtîkayên dûrxistinê û bêberpirsyariyeke kûr nêzîkî doz û birînên civaka Êzidî dibin.
Cihê êş, sosret û şermezariyeke mezin e ku di salvegera reş a Jenosîda Êzidiyan de dema ku tevahiya mirovahiyê û cîhana şaristanî êş û karesata gelê me bi bîr tîne, Serokê Herêma Kurdistanê di qesra serokatiya rejimê de li Şamê bi Ebû Mihemed el-Colanî re hevdîtinek fermî û germ pêk tîne. Colanî kesekî ku li dijî Êzidiyan sûc kiriye û diviya niha hatibaya darizandin, lê tişta ku diqewime sosret e û temamî berovajî vê ye. Wekî ku raya giştî baş dizane, di sala 2014’an de dema ku çeteyên DAÎŞ’ê êrîşî Şengalê kirin û karesat anîn serê gelê me, Nêçîrvan Barzanî Serokwezîrê Herêma Kurdistanê bû. Li şûna ku hemû derfetên xwedîderketinê û desthilata xwe ji bo parastin û rizgarkirina Êzidiyan bi kar bîne, helwesteke bêdeng û bêkêr hate nîşandan. Îro jî li şûna ku li cem civaka Êzidî bisekine, berpirsyariya xwe bipejirîne û lêborîna fermî ji gelê me yê birîndar bixwaze, rabûye bi Cîgirê Ebû Bekir el-Bexdadî re dicive.
Em weke civaka Êzidî baş dizanin ku ev hevdîtin û nîqaşên li pişt deriyên girtî tê çi wateyê. Di sala 2014’an de peywendî û bazarî bi dizî û di bin tewlê re dihatin kirin, îro li ber çavên hemû cîhanê û bêîstîsna, weke du serokan li hev rûniştine û planên nû li dijî paşeroja gelê me amade dikin. Ya ku êşa me kûrtir dike ew e ku, li aliyekî ev hevdîtinên hevkariyê têne kirin, li aliyê din jî Encûmena Niştimanî ya Kurd li Sûriyeyê (ENKS) radibe vê roja reş û tijî xwîn weke ‘cejn’ ji bo gelê Kurd pênase dike. Ev helwest xencereke duyemîn e ku li pişta rûmet û bîranîna şehîdên me tê xistin.
Em weke Civaka Êzidî bi vê daxuyaniyê careke din diyar dikin ku ev kiryar û planên gemar li dijî vîna gelê me ne. Heta ku hemû berpirsiyarên Jenosîdê li ber dadgehên navneteweyî neyên darizandin, statû û ewlehiya Şengalê neyê garantîkirin û edaleta rastîn pêk neyê, em ê dest ji têkoşîn û berxwedana xwe bernedin.”
