Li gelek bajaran ji bo şervanê Tugaya Hesekê ya Bakur û Rojhilatê Sûriyeyê Sîpan Hiznî (Seban / Samî Şêxmus Hasû) ku hatibû revandin û qetilkirin û bûyera li Girtîgeha Kobanê daxuyanî hat dayîn.
RIHA
Platforma Ked û Demokrasiyê ya Rihayê, qetilkirina Sîpan Hiznî û qetlîama li Girtîgeha Kobanê qewimî protesto kir. Daxuyaniya ku li ber avahiya Partiya Wekhevî û Demokrasiyê ya Gelan (DEM Partî) ya Rihayê hat dayîn, gelek kes tevli bûn. Metna daxuyaniyê bi Kurdî û Tirkî hate xwendin.
Hevseroka DEM Partiyê ya Rihayê Ayşe Surucu li vir axivî û ev tişt got: “Ev bûyer parçeyek ji polîtîkayên pevçûndana gelên li Sûriyeyê ye. Li dijî van polîtîkayên ku îradeya jiyana wekhev û azad a gelan, pêvajoya entegrasyona demokratîk û hewldanên aştiyê lawaz dikin, divê helwesteke hevpar bê nîşandan. Dahatûya Sûriyeyê divê li ser bingehê îradeya gelan û lihevkirina demokratîk bê avakirin, ne ji polîtîkayên pevçûn, zext û alozî, lê divê ji avakirina jiyaneke demokratîk a li ser bingehê wekhevî, azadî û aştiyê re qad bê vekirin.”
Daxuyanî bi dirûşma “Şehîd namirin” bi dawî bû.
MÛŞ
Platforma Saziyên Demokratîk a Mûşê, li Qada Kobanê ya li bajêr daxuyanî da. Polîsan hewl da bi hinceta “hûn nikarin pankartê vekin” rê li ber meşa girseyê ya ji ber Avahiya Partiya Herêman a Demokratîk (DBP) ber bi qadê ve bigire. Welatiyên ku bertek nîşanî polîsan dan, li ber avahiya bajar ji bo demek dirêj çalakîya rûniştinê li dar xistin.
Di çalakiya rûniştinê de ligel tilîliyan, gelek caran dirûşmên “Bijî berxwedana Rojava”, “Sîpan Hiznî rûmeta me ye” û “Yek e yek e yek e, gelê Kurd yek e” hatin berzkirin. Encamê hevdîtinan de girse bi tilîliyan û çepikan ber bi qadê ve meşiya. Di daxuyaniyê de pankarta “Rojava wijdana me ye, azadî ye, berxwedan e. Nayê teslîmgirtin”, “Xwedîderketina li Rojava, xwedîderketina li mirovahiyê ye” hate hilgirtin.
Piştre Parlamenterê DEM Partiyê yê Agiriyê Sirri Sakik axivî û bertek nîşanî helwesta polîsan a provokatîf da. Sakik destnîşan kir ku divê polîs dev ji van helwestên ku zirarê didin pêvajoya aştiyê berdin.
Daxuyanî bi çepikan bi dawî bû.
KOP
Li Kopê jî li ber avahiya DEM Partiyê ya Kopê daxuyanî hate dayîn. Metna hevpar ji aliyê rêveberê DEM Partiyê yê Kopê Sabahattîn Ustundag ve hate xwendin.
BEDLÎS
Platforma Saziyên Demokratîk a Bedlîsê jî li rawestgeha kevn a Tetwanê ya li Xelatê daxuyanî da. Di daxuyaniya ku gelek kes tevli bûn de pankarta “Rojava wijdana me ye, azadî ye, berxwedan e. Nayê teslîmgirtin”, “Xwedîderketina li Rojava, xwedîderketina li mirovahiyê ye” hate vekirin.
Hevserokê DEM Partiyê yê Xelatê Mezher Toplu yê ku metna daxuyaniyê xwend, destnîşan kir ku divê dev ji polîtîkayên ku gelên Sûriyeyê bi hev re didin pevçûn berdin.
KONYA
Rêxistina DEM Partiyê ya Konyayê, li avahiya bajar ji bo qetilkirina şervanê Tugaya Hesekê Sîpan Hiznî (Seban / Samî Şêxmus Hasû) û girtiyên ku di encama midaxeleya li Girtîgeha Kobanê de jiyana xwe ji dest dabûn daxuyanî da. Metna daxuyaniyê ji aliyê Hevserokê DEM Partiyê yê Konyayê Mulla Şîmşek ve hate xwendin.
