Yekîtiya Hunermendên Cîzîrê û Navenda Çand û Hunerê ya Mihemed Şêxo bi boneya 37’emîn salvegera wefata hunermendê nemir ê Kurd Mihemed Şêxo, li Navenda Çand û Hunerê ya Mihemed Şêxo ya li Qamişloyê merasîmek bîranînê li dar xistin.
Hunermend, nivîskar, rewşenbîr, malbata Mihemed Şêxo û gelek hezkiriyên wî ku piraniya wan ciwan bûn, beşdarî merasîma bîranînê bûn.
Birayê Mihemed Şêxo Beha Şêxo di merasîma bîranînê de axivî û got, “Mihemed Şêxo digot, ‘Sed sal jî piştî mirina min derbas bibe, gel wê guh bide min û stranên min şîrove bike. Ez ji vê bawer dikim.'”
Beha Şêxo diyar kir ku Mihemed Şêxo stranên şoreşgerî, evînî û civakî gotiye û sê nifş bi guhdarîkirina stranên wî mezin bûn.
Piştî axaftinan, Koma Ciwanan a Mihemed Şêxo û Koma Botan stranên Mihemed Şêxo gotin. Hunermend Sefqan Orkêş û Amir Remo jî di merasîmê de stran gotin.
Mihemed Şêxo di sala 1948’an de li gundê Xecokê yê Qamişloyê ji dayik bû û di 9’ê Adara 1989’an de li Qamişloyê wefat kir.
